(www.kl14onlinenews.com)
(18-Feb-2025)
ചാമ്പ്യന്‍സ് ട്രോഫി 2025: എന്തുകൊണ്ട് ഇന്ത്യന്‍ പതാകയില്ല? വിശദീകരണവുമായി പി.സി.ബി
കറാച്ചി: ചാമ്പ്യന്‍സ് ട്രോഫി ക്രിക്കറ്റ് ടൂര്‍ണമെന്റിന്റെ വേദികളായ കറാച്ചി, ലാഹോര്‍ സ്റ്റേഡിയങ്ങളില്‍ ഇന്ത്യന്‍ പതാകയില്ലാത്തതില്‍ വിശദീകരണവുമായി പാകിസ്താന്‍ ക്രിക്കറ്റ് ബോര്‍ഡ്. കറാച്ചി നാഷനല്‍ സ്റ്റേഡിയത്തിലും ലാഹോറിലെ ഗദ്ദാഫി സ്റ്റേഡിയത്തിലും ടൂര്‍ണമെന്റില്‍ പങ്കെടുക്കുന്ന മറ്റ് ടീമുകളുടെ പതാകയുള്ളപ്പോള്‍ ഇന്ത്യന്‍ പതാക മാത്രമില്ലെന്ന വാര്‍ത്തകള്‍ വലിയ വിവാദമായിരുന്നു. പിന്നാലെയാണ് വിശദീകരണവുമായി പി.സി.ബി രംഗത്തെത്തിയത്.
സ്റ്റേഡിയത്തില്‍ മത്സരിക്കുന്ന ടീമുകളുടെയും ആതിഥേയ രാജ്യത്തെ ക്രിക്കറ്റ് ബോര്‍ഡിന്റെയും അന്താരാഷ്ട്ര ക്രിക്കറ്റ് കൗണ്‍സിലിന്റെയും (ഐ.സി.സി) പതാകകളാണ് സ്ഥാപിക്കേണ്ടതെന്നും ഐ.സി.സിയുടെ നിര്‍ദേശമാണിതെന്നും പി.സി.ബി വ്യക്തമാക്കി. ‘പാകിസ്താനിലെ മൂന്നു വേദികളിലും ഇന്ത്യയുടെ പതാകയുണ്ടാകില്ല. എട്ടു ടീമുകള്‍ പങ്കെടുക്കുന്ന ടൂര്‍ണമെന്റില്‍ ഇന്ത്യയുടെ മത്സരങ്ങളെല്ലാം ദുബൈയിലാണ് നടക്കുന്നത്. ചാമ്പ്യന്‍സ് ട്രോഫി മത്സരദിവസം നാലു പതാകകള്‍ മാത്രമാണ് സ്റ്റേഡിയത്തില്‍ ഉയര്‍ത്തുന്നത്. ഐ.സി.സിയുടെയും പി.സി.ബിയുടെയും പിന്നെ മത്സരിക്കുന്ന രണ്ടു ടീമുകളുടെയും, അത്രമാത്രം’ -പി.സി.ബി വക്താവ് പ്രതികരിച്ചു.
ഇന്ത്യന്‍ നായകന്‍ രോഹിത് ശര്‍മയുടേതടക്കം ബാനറുകള്‍ രാജ്യത്തെ വിവിധ നഗരങ്ങളില്‍ സ്ഥാപിച്ചിട്ടുണ്ട്. ഇതൊന്നും മനസ്സിലാക്കാതെ ചിലര്‍ അനാവശ്യ വിവാദങ്ങള്‍ സൃഷ്ടിക്കുകയാണെന്നും പി.സി.ബി ആരോപിച്ചു. സുരക്ഷാപരമയ കാരണങ്ങളാല്‍ പാകിസ്താനിലേക്ക് ഇല്ലെന്ന് അറിയിച്ചതോടെ ഇന്ത്യയുടെ മത്സരങ്ങള്‍ ഹൈബ്രിഡ് മോഡലില്‍ ദുബൈയിലാണ് നടത്തുന്നത്. ഇതിനാലാണ് ഇന്ത്യന്‍ പതാക പാകിസ്താനിലെ സ്റ്റേഡിയത്തില്‍ വെക്കാത്തതെന്നാണ് പി.സി.ബി വിശദീകരണം.
Post a Comment