(www.kl14onlinenews.com)
(14-Aug-2023)
കേന്ദ്രമന്ത്രിയുടെ പോലീസ് മെഡലുകള്‍; കേരളത്തിൽ നിന്ന് 9 പേർക്ക്
ഡൽഹി :
അന്വേഷണ മികവിനുള്ള കേന്ദ്ര ആഭ്യന്തര മന്ത്രിയുടെ പൊലീസ്‌ മെഡലുകൾ നേടി കേരളത്തിൽ നിന്നുള്ള ഒൻപത് ഉദ്യോഗസ്ഥര്‍. എസ്‌പിമാരായ വൈഭവ് സക്സേന, ആർ ഇളങ്കോ, ഡി ശിൽപ, അഡീഷണൽ എസ്‌പി എം കെ സുൽഫിക്കർ, ഡിവൈഎസ്‌പിമാരായ പി രാജ്കുമാർ, ജെ കെ ദിനിൽ, സിഐമാരായ കെ ആർ ബിജു, പി ഹരിലാൽ, എസ്‌ഐ കെ സാജൻ എന്നിവരാണ് മെഡലിന് അർഹരായത്.
നിലവിൽ കാസർഗോഡ് ജില്ലാ പോലീസ് മേധാവിയാണ് വൈഭവ് സക്സേന. പോലീസ് ആസ്ഥാനത്ത് എഎഐജിയായും തിരുവനന്തപുരം സിറ്റി ഡെപ്യൂട്ടി കമ്മീഷണറായും ജോലി നോക്കുന്നു. സ്റ്റേറ്റ് സ്പെഷ്യൽ ബ്രാഞ്ചിൽ ടെക്നിക്കൽ ഇന്റലിജൻസ് വിഭാഗം എസ്പിയാണ് ആർ ഇളങ്കോ.
കൊല്ലം റൂറൽ, കണ്ണൂർ സിറ്റി എന്നിവിടങ്ങളിൽ ജില്ലാ പോലീസ് മേധാവിയായിരുന്നു. തിരുവനന്തപുരം റൂറൽ പൊലീസ്‌ മേധാവിയാണ് ഡി ശിൽപ. കോട്ടയം ജില്ലാ പോലീസ് മേധാവി, വനിതാ ബറ്റാലിയൻ കമാൻഡന്റ്‌ എന്നീ പദവികളും വഹിച്ചിട്ടുണ്ട്. മാറനല്ലൂരിൽ അമ്മയെയും കുഞ്ഞിനെയും കൊലപ്പെടുത്തിയ കേസിലെ അന്വേഷണ മികവിനാണ്‌ പുരസ്കാരം ലഭിച്ചത്. ഇതേ കേസിൽ അന്വേഷണ ഉദ്യോഗസ്ഥരാണ്‌ അവാർഡിനർഹരായ ഡിവൈഎസ്‌പി എം കെ സുൽഫിക്കറും എസ്‌ഐ കെ സാജനും. തിരുവനന്തപുരം റൂറൽ അഡീഷണൽ എസ്പിയാണ് സുൽഫിക്കർ.
നിലവിൽ കൊച്ചി അസിസ്റ്റന്റ് കമീഷണറായ പി രാജ്‌ കുമാറിന്‌ വിസ്മയ കേസിലെ അന്വേഷണ മികവിനാണ്‌ പുരസ്കാരം ലഭിച്ചത്. തിരുവനന്തപുരം റൂറൽ ജില്ലാ ക്രൈംബ്രാഞ്ചിൽ സിഐയാണ്‌ കെ സാജൻ.
വിദേശ വനിതയുടെ കൊലപാതകം തെളിയിച്ചതാണ്‌ സ്റ്റേറ്റ് സ്പെഷ്യൽ ബ്രാഞ്ച് ആസ്ഥാനത്ത് അഡ്മിനിസ്ട്രേഷൻ വിഭാഗം അസിസ്റ്റന്റ് കമീഷണറായ ജെ കെ ദിനിലിനെ അവാർഡിനർഹനാക്കിയത്‌. തിരുവനന്തപുരം സിറ്റി, എറണാകുളം സിറ്റി, കോഴിക്കോട് സിറ്റി എന്നിവിടങ്ങളിൽ ഡി സി ആർ ബി അസിസ്റ്റന്റ് കമീഷണറും ഫോർട്ട് അസിസ്റ്റന്റ് കമീഷണറും നെടുമങ്ങാട് ഡിവൈഎസ്‌പിയുമായിരുന്നു.
പി ഹരിലാൽ തിരുവനന്തപുരം മെഡിക്കൽ കോളേജ്‌ സിഐയാണ്‌. മനോരമ വധക്കേസിലെ പ്രതിയെ അതിവേഗം പിടികൂടി നിയമത്തിന്‌ മുന്നിലെത്തിച്ചതാണ്‌ അദ്ദേഹത്തെ പുരസ്കാരത്തിന്‌ അർഹനാക്കിയത്‌. കെ ആർ ബിജു നിലവിൽ ചവറ സിഐയാണ്‌. തിരുവനന്തപുരം ഫോർട്ട്, നെയ്യാറ്റിൻകര, ശ്രീകാര്യം പോലീസ് സ്റ്റേഷനുകളിലും സിഐയായിരുന്നു.
Post a Comment