കർണാടക മുഖ്യമന്ത്രി എന്തുകൊണ്ട് സ്വീകരിക്കാനെത്തിയില്ല; വിശദീകരിച്ച് പ്രധാനമന്ത്രി മോദി

(www.kl14onlinenews.com)

(26-Aug-2023)

കർണാടക മുഖ്യമന്ത്രി എന്തുകൊണ്ട് സ്വീകരിക്കാനെത്തിയില്ല; വിശദീകരിച്ച് പ്രധാനമന്ത്രി മോദി

ബാംഗ്ലൂർ :

ചന്ദ്രയാൻ-3 വിജയത്തിന് ശേഷം ഇസ്രോ ശാസ്ത്രജ്ഞരെ അഭിനനന്ദിക്കാൻ പ്രധാനമന്ത്രി നരേന്ദ്ര മോദി ഇന്ന് രാവിലെ ബെംഗളൂരുവിലെത്തി. എയർപോർട്ടിൽ അദ്ദേഹത്തെ സ്വീകരിക്കാൻ കർണാടക മുഖ്യമന്ത്രി സിദ്ധരാമയ്യയോ ഉപമുഖ്യമന്ത്രി ഡികെ ശിവകുമാറോ എത്തിയിരുന്നില്ല.

അതേസമയം വിമാനത്താവളത്തിലെത്തി സ്വീകരിക്കുന്നതിൽ നിന്ന് മുഖ്യമന്ത്രിയെ പ്രധാനമന്ത്രി തടഞ്ഞുവെന്ന് കോൺഗ്രസ് ആരോപിച്ചു. ഇത് പ്രോട്ടോക്കോൾ ലംഘനമാണെന്നും കോൺഗ്രസ് പറഞ്ഞു.

"തനിക്ക് മുൻപ് കർണാടക മുഖ്യമന്ത്രിയും ഉപമുഖ്യമന്ത്രിയും ഇസ്രോയിലെ ശാസ്ത്രജ്ഞരെ അഭിനന്ദിച്ചതിന് പ്രധാനമന്ത്രിയ്ക്ക് അതൃപ്തിയുണ്ട്. അതുകൊണ്ടാണ് വിമാനത്താവളത്തിൽ സ്വീകരിക്കുന്നതിൽ നിന്ന് മുഖ്യമന്ത്രിയെ അദ്ദേഹം തടഞ്ഞത്. ഇത് പ്രോട്ടോക്കോളിന് എതിരാണ്. ഇത് രാഷ്ട്രീയമല്ലാതെ മറ്റൊന്നുമല്ല." മുതിർന്ന കോൺഗ്രസ് നേതാവ് ജയറാം രമേഷ് എക്‌സിൽ പോസ്റ്റ് ചെയ്തു.

ഡോ. മൻമോഹൻ സിംഗ് പ്രധാനമന്ത്രിയായിരുന്ന സമയത്ത് ചന്ദ്രയാൻ-1 വിജയകരമായി വിക്ഷേപിച്ചതിന്, തൊട്ടുപിന്നാലെ 2008 ഒക്‌ടോബർ 22-ന്, അഹമ്മദാബാദിലെ സ്‌പേസ് ആപ്ലിക്കേഷൻസ് സെന്ററിൽ മുഖ്യമന്ത്രിയായിരുന്ന മോദി നടത്തിയ സന്ദർശനം പ്രധാനമന്ത്രി മോദി മറന്നോ?." ജയറാം രമേശ് കൂട്ടിച്ചേർത്തു.

അതേസമയം എപ്പോൾ ബെംഗളൂരുവിലെത്തുമെന്ന് അറിയാത്തതിനാൽ മന്ത്രിയെ ബുദ്ധിമുട്ടിക്കാൻ ആഗ്രഹിക്കുന്നില്ലെന്ന് പ്രധാനമന്ത്രി പറഞ്ഞു .

“ശാസ്ത്രജ്ഞരുമായുള്ള കൂടിക്കാഴ്ചയ്ക്ക് ശേഷം തിരിച്ച് പോകുമെന്നതിനാൽ മുഖ്യമന്ത്രിയോടും ഗവർണറോടും വരരുതെന്ന് പറഞ്ഞിരുന്നു. പ്രോട്ടോക്കോൾ പാലിക്കേണ്ട കാര്യമില്ലെന്ന് അഭ്യർത്ഥിച്ചിരുന്നു."- ജനക്കൂട്ടത്തെ അഭിസംബോധന ചെയ്തുകൊണ്ട് പ്രധാനമന്ത്രി പറഞ്ഞു.

ബെംഗളൂരുവിലെ പീനിയ ഇൻഡസ്ട്രിയൽ ഏരിയയിലുള്ള ഇസ്രോയുടെ ടെലിമെട്രി, ട്രാക്കിംഗ് ആൻഡ് കമാൻഡ് സെന്ററിലെ ശാസ്ത്രജ്ഞരുമായും ഉദ്യോഗസ്ഥരുമായും പ്രധാനമന്ത്രി കൂടിക്കാഴ്ച നടത്തി.

ബ്രിക്‌സ് ഉച്ചകോടിയിൽ പങ്കെടുക്കാൻ ദക്ഷിണാഫ്രിക്കയിലായിരുന്നു പ്രധാനമന്ത്രി. ചന്ദ്രയാൻ -3 യുടെ വിജയകരമായി സോഫ്റ്റ് ലാൻഡിംഗിന് ശേഷം ഫോണിലൂടെ ഇസ്രോ മേധാവി എസ് സോമനാഥിനെ ഫോണിൽ വിളിച്ച് ഊഷ്മളമായ അഭിനന്ദനങ്ങൾ അറിയിച്ചിരുന്നു . വിജയകരമായ ദൗത്യത്തെ "ഒരു പുതിയ യുഗത്തിന്റെ ആരംഭം" എന്ന് അഭിനന്ദിച്ച അദ്ദേഹം, മുഴുവൻ ടീമിനെയും വ്യക്തിപരമായി അഭിവാദ്യം ചെയ്യാൻ ബെംഗളൂരുവിൽ എത്തുമെന്നും പറഞ്ഞിരുന്നു