(www.kl14onlinenews.com)
(July -16-2023)
ലോറിയിൽ ചുറ്റിയിരുന്ന കയർ കുരുങ്ങി അപകടം; കാല്‍നട യാത്രക്കാരന് ദാരുണാന്ത്യം
കോട്ടയം സംക്രാന്തിയില്‍ ലോറി ജീവനക്കാര്‍ അശ്രദ്ധമായി ലോറിയിലിട്ട കയര്‍ കുരുങ്ങി കാല്‍നടയാത്രക്കാരന് ദാരുണ മരണം. ബൈക്ക് യാത്രികര്‍ അടക്കം രണ്ടു പേര്‍ക്ക് പരുക്കേല്‍ക്കുകയും ചെയ്തു. ചുങ്കം സ്വദേശി മുരളിയാണ് ദാരുണമരണത്തിനു ഇരയായത്. കാല്‍നട യാത്രക്കാരിയായ സ്ത്രീയും ബൈക്കില്‍ സഞ്ചരിച്ച ദമ്പതിമാരും ലോറിക്കു പിന്നില്‍ക്കെട്ടിയ കയറില്‍ കുരുങ്ങിയെങ്കിലും ഭാഗ്യംകൊണ്ട് രക്ഷപ്പെട്ടു. പരിക്കേറ്റ രണ്ടുപേരെ കോട്ടയം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.
ഏറ്റുമാനൂര്‍ ഭാഗത്തുനിന്ന് പച്ചക്കറിയുമായെത്തിയ ലോറിയില്‍ അലക്ഷ്യമായി ഒരു കയര്‍ തൂങ്ങിക്കിടന്നതാണ് അപകടത്തിന്‌ കാരണം. പ്രഭാത നടത്തത്തിന്നിടെ ചായകുടിക്കാനായി കടയിലേക്ക് പോയ മുരളിയാണ് കയറില്‍ക്കുരുങ്ങി മരിച്ചത്. മുരളിയെ വലിച്ചിഴച്ച് ഇരുന്നൂറോളം മീറ്റര്‍ ലോറി മുന്നോട്ടുനീങ്ങി. റോഡിലുരഞ്ഞ് മുരളിയുടെ ഒരു കാല്‍ അറ്റുപോയി. ഇതിനിടെ മുരളിയുടെ തല വഴിയോരത്തുണ്ടായിരുന്ന ഒരു പോസ്റ്റിലിടിച്ച് തകരുകയുംചെയ്തു.
ഇതേ ലോറിയിലെ കയര്‍ കുരുങ്ങിയാണ് ഏറ്റുമാനൂര്‍ ക്ഷേത്രത്തില്‍നിന്ന് തൊഴുതു ബൈക്കില്‍ മടങ്ങുകയായിരുന്ന പെരുമ്പായിക്കാട് സ്വദേശികളായ ദമ്പതികള്‍ക്കും പരുക്കേറ്റത്. ബൈക്കില്‍ സഞ്ചരിക്കുകയായിരുന്ന ഇവര്‍ ഇതേത്തുടര്‍ന്ന് നിലത്തുവീണു. ഇരുവരെയും കോട്ടയം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. ഇതേ കയര്‍ ദേഹത്തു കുരുങ്ങി മറ്റൊരു സ്ത്രീക്കും പരിക്കേറ്റു.
ലോറി കോട്ടയത്ത് പച്ചക്കറിക്കടയിലെത്തിയപ്പോഴാണ് ജീവനക്കാര്‍ കയര്‍ തേടി വന്നത്. ഇരുചക്രവാഹനത്തില്‍ വന്ന തമിഴ്‌നാട് സ്വദേശികളായ ലോറി ഡ്രൈവര്‍ ജീവരാജയും സഹായിയായ രാമുവിനെയും നാട്ടുകാര്‍ പിടിച്ചുവെച്ചശേഷം ഗാന്ധിനഗര്‍ പോലീസിന് കൈമാറുകയായിരുന്നു.
Post a Comment