(www.kl14onlinenews.com)
(Jun-09-2023)
കൊന്ന് നഗ്നയാക്കി ഉപ്പ് വിതറി കുഴിച്ചിട്ടു, പകയായത് വിവാഹത്തിന് തടസമായത്; അമ്പൂരി രാഖി വധക്കേസില്‍ മൂന്ന് പ്രതികള്‍ക്കും ജീവപര്യന്തം
തിരുവനന്തപുരം അമ്പൂരി രാഖി വധക്കേസില്‍ മൂന്ന് പ്രതികള്‍ക്കും ജീവപര്യന്തം തടവ് ശിക്ഷ. പ്രതികളായ സൈനികന്‍ അഖില്‍, സഹോദരന്‍ രാഹുല്‍, സുഹൃത്ത് ആദര്‍ശ് എന്നിവര്‍ക്കാണ് തിരുവനന്തപുരം ആറാം അഡീഷണല്‍ ജില്ലാ സെഷന്‍സ് കോടതി ശിക്ഷ വിധിച്ചത്. മൂന്ന് പ്രതികളും നാല് ലക്ഷം രൂപ പിഴ അടയ്ക്കണം. 12 ലക്ഷം രൂപ പിഴ അടയ്ക്കാത്ത പക്ഷം ഒരു വര്‍ഷം അധിക തടവ് അനുഭവിക്കണം. പിഴത്തുക പെണ്‍കുട്ടിയുടെ കുടുംബത്തിന് നല്‍കണം. പ്രണയബന്ധത്തില്‍ നിന്നും പിന്മാറാത്തതിലുള്ള വൈരാഗ്യത്തില്‍ രാഖിയെ കഴുത്തു ഞെരിച്ചു കൊലപ്പെടുത്തി കുഴിച്ചു മൂടുകയായിരുന്നു. 2019 ജൂണ്‍ 21ന് ആയിരുന്നു കേസിനാസ്പദമായ സംഭവം.
സൈനികനായ അഖിലും കൊല്ലപ്പെട്ട രാഖിയും തമ്മില്‍ പ്രണയത്തിലായിരുന്നു. കൊച്ചിയിലെ ഒരു ക്ഷേത്രത്തില്‍ വച്ച് അഖില്‍ ആരുമറിയാതെ രാഖിയെ വിവാഹം കഴിച്ചു. ഇതിനിടെ മറ്റൊരു പെണ്‍കുട്ടിയുമായി ഇയാള്‍ പ്രണയത്തിലായി. ഈ പെണ്‍കുട്ടിയുമായി വിവാഹം നിശ്ചയിക്കുകയും വിവാഹത്തിന് പദ്ധതിയിടുകയും ചെയ്തത് രാഖി അറിഞ്ഞു. ഇതിന് രാഖി തടസം നിന്നതോടെ കൊലപ്പെടുത്താന്‍ പ്രതികള്‍ തീരുമാനിക്കുകയായിരുന്നു.
സംഭവദിവസം രാഖി നെയ്യാറ്റിന്‍കര ബസ് സ്റ്റാന്‍ഡിലെത്തി. ഇവിടെ നിന്ന് സഹോദരനായ രാഹുലും അഖിലും രാഖിയെ തന്ത്രപരമായി കാറില്‍ കയറ്റിക്കൊണ്ടുപോകുകയായിരുന്നു. കാറില്‍ വെച്ച് യുവതിയുടെ കഴുത്ത് ഞെരിച്ച് കൊല്ലാന്‍ ശ്രമിച്ചു. അബോധാവസ്ഥയിലായ യുവതിയുമായി രാഹുലിന്റെ പണി നടക്കുന്ന വീട്ടിലെത്തിച്ച് കയര്‍ ഉപയോഗിച്ച് കഴുത്ത് ഞെരിച്ച് മരണം ഉറപ്പിച്ചു. തുടര്‍ന്ന് അയല്‍വാസിയായ ആദര്‍ശിന്റെ സഹായത്തില്‍ മൃതദേഹം കുഴിച്ചുമൂടുകയായിരുന്നു. നഗ്നയാക്കിയ ശേഷം ഉപ്പുകല്ലുകള്‍ വിതറിയാണ് മൃതദേഹം കുഴിച്ചിട്ടത്. ഇതിന് മുകളില്‍ പ്രതികള്‍ കമുക് തൈകള്‍ നട്ടു.
Post a Comment