(www.kl14onlinenews.com) (26-Apr-2020)
കോവിഡിൽ നിന്നും രോഗമുക്തി നേടി പ്രസവം; ആരോഗ്യ പ്രവർത്തകർക്ക് നന്ദി പറഞ്ഞ് ഫാത്തിമയും കുടുംബവും
കണ്ണൂര്‍ :പരിയാരം മെഡിക്കല്‍ കോളജില്‍ നിന്ന് കോവിഡ് രോഗമുക്തി നേടി പ്രസവ ശസ്ത്രക്രിയ നടന്ന കാസർകോട് സ്വദേശിയായ ഉമ്മയും കുഞ്ഞും ആശുപത്രി വിട്ടു. ഫാത്തിമയ്ക്കും (21) കുഞ്ഞിനും മെഡിക്കല്‍ കോളേജ് പ്രിന്‍സിപ്പല്‍ ഡോ. എന്‍.റോയിയുടെ നേതൃത്വത്തില്‍ മെഡിക്കല്‍ കോളജ് ജീവനക്കാര്‍ യാത്രയയപ്പ് നല്‍കി.
കോവിഡ് രോഗമുക്തി നേടിയ യുവതിയുടെ ഭര്‍ത്താവിനെ നേരത്തെ തന്നെ ആശുപത്രിയില്‍ നിന്ന് ഡിസ്ചാര്‍ജ് ചെയ്തിരുന്നു. മികച്ച ചികിത്സ നല്‍കി ഉമ്മയെയും കുഞ്ഞിനേയും രക്ഷിച്ച മെഡിക്കല്‍ കോളജ് ജീവനക്കാരെ ആരോഗ്യ മന്ത്രി കെ.കെ.ശൈലജ അഭിനന്ദിച്ചു. മാര്‍ച്ച് 20നാണ് കാസർകോട് ജില്ലയില്‍ നിന്നും കോവിഡ് ബാധിച്ച യുവതിയെയും ഭര്‍ത്താവിനെയും പരിയാരം മെഡിക്കല്‍ കോളജില്‍ ചികിത്സയ്ക്കായി എത്തിച്ചത്.
തുടര്‍ന്നുള്ള ചികിത്സയില്‍ ഇവരുടെ രോഗം ഭേദമായി. ഏപ്രില്‍ 9ന് പുറത്തുവന്ന യുവതിയുടെ പരിശോധനാഫലം നെഗറ്റീവ് ആയിരുന്നു. എന്നാല്‍ പ്രസവ തീയതി അടുത്തതിനാല്‍ യുവതി ആശുപത്രിയില്‍ തന്നെ തുടര്‍ന്നു. ഏപ്രില്‍ 11ന് ഉച്ചയ്ക്ക് 12.20ന് ആണ്‍കുഞ്ഞിനു ജന്മം നല്‍കി. മികച്ച ചികിത്സ നല്‍കിയ ആശുപത്രിയിലെ എല്ലാവര്‍ക്കും നന്ദി പറഞ്ഞാണ് കുടുംബം വീട്ടിലേക്ക് മടങ്ങിയത്.
إرسال تعليق