ആവേശം വാനോളം; ചാമ്പ്യൻസ് ട്രോഫി ഫൈനലിൽ ഇന്ത്യ-ന്യൂസിലന്‍ഡ് പോരാട്ടം

(www.kl14onlinenews.com)

(09-Mar-2025)

ആവേശം വാനോളം; ചാമ്പ്യൻസ് ട്രോഫി ഫൈനലിൽ ഇന്ത്യ-ന്യൂസിലന്‍ഡ് പോരാട്ടം

ദുബൈ: കായിക പ്രേമികൾ കാത്തിരുന്ന ചാമ്പ്യൻസ്​ ട്രോഫി ക്രിക്കറ്റ്​ മത്സരത്തിന്‍റെ കലാശപ്പോരിൽ ഇന്ത്യ ഇന്ന്​ ദുബൈയിൽ ന്യൂസിലൻഡുമായി ഏറ്റുമുട്ടുമ്പോൾ രാജ്യത്തിൻറെ അഭിമാന നിമിഷത്തിന്​ പ്രതീക്ഷയോടെ കാത്തിരിക്കുകയാണ്​ ഇന്ത്യൻ ആരാധകർ.

ഇന്ത്യൻ ക്രിക്കറ്റ്​ ടീമിന്‍റെ നിരവധി വിജയങ്ങൾക്ക്​ സാക്ഷ്യംവഹിച്ച മണ്ണായ യു.എ.ഇയിൽ വീണ്ടുമൊരു വിജയ മുഹൂർത്തം പിറക്കുമെന്നാണ്​ കായിക പ്രേമികളിൽ മിക്കവരും പ്രതീക്ഷ വെക്കുന്നത്​. മുൻ മത്സരങ്ങളിലെ മികവുറ്റ പ്രകടനം വെച്ചുനോക്കുമ്പോൾ കളി വിദഗ്​ധരും ഇന്ത്യക്ക്​ ഒരു മുൻകൈ പ്രവചിക്കുന്നുണ്ട്​. ദുബൈയിൽ ഇന്ത്യക്ക്​ ലഭിക്കുന്ന മികച്ച ആരാധക പിന്തുണയും ടീമിന്​ ആത്മവിശ്വാസം പകരുന്ന വലിയ ഘടകമാണ്​. ദുബൈയിൽ 35ഡിഗ്രി വരെ ചൂടാണ്​ ശനിയാഴ്ച രേഖപ്പെടുത്തിയതെങ്കിലും ഞായറാഴ്ച ചെറിയ മഴക്കൊപ്പം താപനില കുറയാനുള്ള സാഹചര്യം ഇപ്പോൾ പ്രവചിക്കുന്നുണ്ട്​. എന്നാൽ കളി മുടങ്ങാൻ സാധ്യതയുള്ള മഴ പ്രവചിക്കപ്പെടുന്നില്ല.

40മിനിറ്റിനകമാണ്​ മത്സരത്തിന്‍റെ ടിക്കറ്റുകൾ ഒഫീഷ്യൽ വെബ്​സൈറ്റിലൂടെ വിറ്റഴിഞ്ഞത്​. യു.എ.ഇ സമയം രാവിലെ 10ന്​ ആരംഭിച്ച വിൽപന 10.40ന്​ അവസാനിക്കുകയായിരുന്നു. സാധാരണ പ്രവേശനത്തിനുള്ള 250ദിർഹമിന്‍റെ ടിക്കറ്റ്​ മുതൽ 12,000 ദിർഹമിന്‍റെ സ്​കൈ ബോക്സ്​ ടിക്കറ്റുകൾ വരെയാണ്​ വിൽപനക്കുണ്ടായിരുന്നത്​. ഇന്ത്യൻ ആരാധകർ തന്നെയാണ്​ വലിയ ശതമാനം ടിക്കറ്റുകളും സ്വന്തമാക്കിയത്​. പ്രത്യേകിച്ച്​ പ്രവാസികളായ ഇന്ത്യക്കാർ വളരെ ആവേശപൂർവമാണ്​ മത്സരം കാത്തിരിക്കുന്നത്​.

ഫാൻസ്‌ കൂടുതൽ ഇന്ത്യ v/s പാക് കളികൾക്ക്

ചാമ്പ്യൻസ്ട്രോഫി ക്രിക്കറ്റിലെ ഇന്ത്യൻ മത്സരങ്ങൾക്കുള്ള ടിക്കറ്റുകൾ​ നേരത്തേയും അതിവേഗത്തിലാണ്​ വിറ്റുപോയത്​. ഇന്ത്യ-പാക്​ മത്സരത്തിന്‍റെ ടിക്കറ്റിനായിരുന്നു കൂടുതൽ ആവശ്യക്കാരുണ്ടായിരുന്നത്​. വലിയ ആരാധക വൃന്ദം മത്സരം വീക്ഷിക്കാൻ എത്തിച്ചേരുന്ന സാഹചര്യത്തിൽ പഴുതടച്ച മുന്നൊരുക്കങ്ങളാണ്​ ദുബൈ അധികൃതർ ഒരുക്കിയിട്ടുള്ളത്​. നിയമങ്ങൾ ലംഘിക്കുന്നവർക്ക് 5000 ദിർഹം മുതൽ 30,000 ദിർഹം വരെ പിഴയും തടവ് ശിക്ഷയും വരെ ലഭിക്കുമെന്ന​ മുന്നറിയിപ്പും നൽകിയിട്ടുണ്ട്​.

അനുവാദമില്ലാതെ ​ഗ്രൗണ്ടിലോ മറ്റു ഒഫീഷ്യൽ ഏരിയകളിലോ അതിക്രമിച്ചു കടക്കരുത്, പടക്കങ്ങൾ, അപകടമുണ്ടാക്കുന്ന മറ്റു വസ്തുക്കൾ തുടങ്ങിയവ സ്റ്റേഡിയത്തിലേക്ക് കൊണ്ടുവരരുത്, സ്റ്റേഡിയത്തിൽ അക്രമങ്ങളോ ആക്ഷേപങ്ങളോ വെല്ലുവിളികളോ പാടില്ല, രാഷ്ട്രീയ പ്രചാരണ പ്രവർത്തനങ്ങൾ പാടില്ല തുടങ്ങിയവയാണ്​ നിർദേശങ്ങളായി പുറപ്പെടുവിച്ചിട്ടുള്ളത്​. കളിക്കാർക്കും ആരാധകർക്കും സുരക്ഷിതവും മികച്ചതുമായ കളിയനുഭവം ഉറപ്പാക്കാൻ എല്ലാ സുരക്ഷ നടപടികളും ഉറപ്പാക്കിയിട്ടുണ്ടെന്ന് ദുബൈ ഇവന്റ് സെക്യൂരിറ്റി കമ്മിറ്റി(ഇ.എസ്.സി) കഴിഞ്ഞ ദിവസം പ്രസ്താവനയിൽ അറിയിച്ചിരുന്നു