ആറുവയസ്സുകാരന്റെ സ്നേഹസ്പർശം; സമ്പാദ്യ കുടുക്കയിലെ നാണയങ്ങൾ ഡയാലിസിസ് രോഗികൾക്ക്

(www.kl14onlinenews.com)

(12-Mar-2025)

ആറുവയസ്സുകാരന്റെ സ്നേഹസ്പർശം; സമ്പാദ്യ കുടുക്കയിലെ നാണയങ്ങൾ ഡയാലിസിസ് രോഗികൾക്ക്

കാഞ്ഞങ്ങാട്: ഒരു വർഷത്തിലധികം കാലം സമ്പാദ്യ കുടുക്കയിൽ നാണയങ്ങൾ സ്വരൂപിച്ച ആറുവയസ്സുകാരൻ, ആ നാണയങ്ങളെ ദാനത്തിന്റെ പ്രകാശമായി മാറ്റി. കുണിയ എമിൻ ഇന്റർനാഷണൽ അക്കാദമിയിലെ യു കെ ജി വിദ്യാർത്ഥി മുഹമ്മദ് ഹാമിർ ആണ് തന്റെ സമ്പാദ്യങ്ങൾ ചിത്താരി ഡയാലിസിസ് സെന്ററിന് സംഭാവന ചെയ്ത് മാതൃകയായത്.

വൃക്കരോഗികളുടെ കഷ്ടപ്പാടുകൾക്കൊപ്പം അവർക്കായി പ്രവർത്തിക്കുന്ന ഡയാലിസിസ് സെന്ററിനെക്കുറിച്ച് മാതാപിതാക്കളിൽ നിന്ന് കേട്ട ഹാമിറിന്റെ കുഞ്ഞു മനസ്സ് അത് സ്വയം അനുഭവിച്ചു. തനിക്ക് ചെയ്യാൻ കഴിയുന്ന സഹായം നൽകണമെന്ന ആഗ്രഹം ഇളം മനസ്സിൽ ആഴത്തിൽ പതിഞ്ഞു. അങ്ങനെ, കിട്ടുന്ന ഓരോ നാണയവും മിഠായിക്ക് മാറ്റി പകരം സമ്പാദ്യ കുടുക്കയിൽ നിറയ്ക്കാൻ ഹാമിർ തീരുമാനിച്ചു.

കഴിഞ്ഞ ദിവസം, സമ്പാദ്യ കുടുക്ക നിറഞ്ഞപ്പോൾ, അമ്മ ഹസീന ചിത്താരി ഡയാലിസിസ് സെന്ററിൽ വിളിച്ച് അറിയിച്ചു. മകന്റെ മനോഹരമായ സത്കർമ്മത്തിന് മാതാപിതാക്കൾ അകമഴിഞ്ഞ പ്രോത്സാഹനം നൽകി. ചാരിറ്റി പ്രവർത്തനത്തിന്റെ മഹത്വം മനസ്സിലാക്കി നൂറുകണക്കിന് ഡയാലിസിസ് രോഗികൾക്ക് ഒരു കണി കയെങ്കിലും ആശ്വാസമാകുമെന്ന ചിന്തയായിരുന്നു ഹാമിറിന്റെ പ്രേരണ.

ചാരിറ്റബിൾ ട്രസ്റ്റ് ചെയർമാൻ ഷരീഫ് മിന്നയുടെ സാന്നിധ്യത്തിൽ, ചിത്താരി ഡയാലിസിസ് സെന്റർ അഡ്മിനിസ്ട്രേറ്റർ ഷാഹിദ് പി വി ഹാമിറിൽ നിന്ന് ഫണ്ട് സ്വീകരിച്ചു. ഇഖ്ബാൽ കൂളിക്കാട്, ശിഹാബ് തായൽ എന്നിവരും ചടങ്ങിൽ സംബന്ധിച്ചു.

ഒരു ചെറിയ ഹൃദയം പോലും അതിരില്ലാത്ത സ്നേഹവും കാരുണ്യവും നിറയുന്ന വലിയൊരു ദുഃഖാശ്വാസത്തിന് കാരണമാകാമെന്ന സന്ദേശം ഹാമിർ നൽകുകയാണ്. നന്മയുടെ വിത്തു വിതയ്ക്കുന്ന ഈ കൊച്ചു മിടുക്കനെ സമൂഹം ഒരുമിച്ചു കൈതാങ്ങും.