തെരഞ്ഞെടുപ്പ് കമ്മീഷണറെ തിരഞ്ഞെടുക്കാനുള്ള അർദ്ധരാത്രിയിലെ നീക്കം അനാദരവ്: രാഹുൽ ഗാന്ധി

(www.kl14onlinenews.com)

(18-Feb-2025)

തെരഞ്ഞെടുപ്പ് കമ്മീഷണറെ തിരഞ്ഞെടുക്കാനുള്ള അർദ്ധരാത്രിയിലെ നീക്കം അനാദരവ്: രാഹുൽ ഗാന്ധി

പുതിയ മുഖ്യ തിരഞ്ഞെടുപ്പ് കമ്മീഷണറെ (CEC) നിയമിക്കാനുള്ള പ്രധാനമന്ത്രിയുടെയും ആഭ്യന്തരമന്ത്രിയുടെയും തിടുക്കത്തിലുള്ള "അർദ്ധരാത്രി തീരുമാനം" അനാദരവും മര്യാദകേടും ആണെന്ന് പ്രതിപക്ഷ നേതാവ് രാഹുൽ ഗാന്ധി. എക്‌സിലാണ് അദ്ദേഹം തൻ്റെ വിയോജന കുറിപ്പ് പങ്കുവെച്ചത്.

തിരഞ്ഞെടുപ്പ് കമ്മീഷണറെ തിരഞ്ഞെടുക്കാനുള്ള മൂന്നംഗ പാനലിൽ അംഗമായിരുന്ന രാഹുൽ ഗാന്ധി, സുപ്രീം കോടതി ഉത്തരവ് ലംഘിച്ച് ഇന്ത്യൻ ചീഫ് ജസ്റ്റിസിനെ കമ്മിറ്റിയിൽ നിന്ന് നീക്കം ചെയ്തതിനും കേന്ദ്രത്തെ വിമർശിച്ചു.

തിടുക്കത്തിൽ എടുത്ത തീരുമാനം "നമ്മുടെ തിരഞ്ഞെടുപ്പ് പ്രക്രിയയുടെ സമഗ്രത"യെക്കുറിച്ചുള്ള കോടിക്കണക്കിന് വോട്ടർമാരുടെ ആശങ്കകൾ വർദ്ധിപ്പിച്ചതായി എംപി തൻ്റെ വിയോജിപ്പ് കുറിപ്പിൽ പറഞ്ഞു.

കമ്മിറ്റിയുടെ ഘടനയും പ്രക്രിയയും സുപ്രീം കോടതിയിൽ ചോദ്യം ചെയ്യപ്പെടുകയും നാൽപ്പത്തിയെട്ട് മണിക്കൂറിനുള്ളിൽ വാദം കേൾക്കുകയും ചെയ്യുമ്പോൾ, പുതിയ മുഖ്യ തെരെഞ്ഞെടുപ്പ് കമ്മീഷണറെ തിരഞ്ഞെടുക്കാൻ പ്രധാനമന്ത്രിയും ആഭ്യന്തരമന്ത്രിയും അർദ്ധരാത്രിയിൽ തീരുമാനമെടുത്തത് അനാദരവും മര്യാദകേടുമാണ്." രാഹുൽ ഗാന്ധി പറഞ്ഞു.

മുൻ ഐഎഎസ് ഉദ്യോഗസ്ഥൻ ഗ്യാനേഷ് കുമാറിനെ മുഖ്യ തിരഞ്ഞെടുപ്പ് കമ്മീഷണറായും ഹരിയാന ചീഫ് സെക്രട്ടറി ഡോ. വിവേക് ​​ജോഷിയെ തെരഞ്ഞെടുപ്പ് കമ്മീഷണറായും രാഷ്ട്രപതി തിങ്കളാഴ്ച നിയമിച്ചു.

പ്രധാനമന്ത്രിയുടെ നേതൃത്വത്തിലുള്ള ഉന്നതതല സമിതി യോഗം ചേർന്നതിന് മണിക്കൂറുകൾക്ക് ശേഷമാണ് ഈ സംഭവവികാസം ഉണ്ടായത്. തിരഞ്ഞെടുപ്പ് പ്രക്രിയയെക്കുറിച്ചുള്ള ഹർജി സുപ്രീം കോടതി ഈ ആഴ്ച പരിഗണിക്കാനിരിക്കെയാണ് നിയമനത്തെ രാഹുൽ ഗാന്ധി എതിർത്തത്.