പനയമ്പാടത്ത് ഇതുവരെ ഉണ്ടായത് 55 അപകടങ്ങൾ; റോഡ് തടഞ്ഞ് നാട്ടുകാരുടെ കടുത്ത പ്രതിഷേധം

(www.kl14onlinenews.com)

(12-Dec-2024)

പനയമ്പാടത്ത് ഇതുവരെ ഉണ്ടായത് 55 അപകടങ്ങൾ; റോഡ് തടഞ്ഞ് നാട്ടുകാരുടെ കടുത്ത പ്രതിഷേധം

പാലക്കാട് കരിമ്പ പനയമ്പാടത്ത് ലോറി ഇടിച്ചുകയറി 4 സ്കൂള്‍ വിദ്യാര്‍ത്ഥികള്‍ മരിച്ച സംഭവത്തിൽ കടുത്ത പ്രതിഷേധവുമായി നാട്ടുകാർ. പാലക്കാട്-കോഴിക്കോട് ദേശിയപാത നാട്ടുകാർ ഉപരോധിക്കുകയാണ്. നിരവധി തവണ പരാതി പറഞ്ഞിട്ടും അധികൃതർ നടപടിയെടുക്കാത്ത സാഹചര്യത്തിലാണ് നാട്ടുകാർ പ്രതിഷേധിക്കുന്നത്.

ജില്ലാ കളക്ടറും ജനപ്രതിനിധികളും എത്തണമെന്നാണ് നാട്ടുകാരുടെ ആവശ്യം. പാലക്കാട് എംഎൽഎ രാഹുൽ മാങ്കൂട്ടത്തിൽ സംഭവസ്ഥലത്ത് ഉണ്ട്.

പാലക്കാട് കരിമ്പാ പഞ്ചായത്തിലെ പനയമ്പാടത്ത് സ്ഥിരമായി അപകടം ഉണ്ടാകുന്നു എന്നാണ് നാട്ടുകാർ പറയുന്നത്

ഇവിടെ ഇതുവരെ 55 അപകടങ്ങൾ ഇവിടെ നടന്നിട്ടുണ്ട്. ഏഴു മരണവും 65 പേർക്ക് പരിക്കേൽക്കുകയും ചെയ്തിട്ടുണ്ട്.

കോങ്ങാട് എംഎൽഎ കെ ശാന്തകുമാരി നിയമസഭയിൽ ശ്രദ്ധ ക്ഷണിക്കലിൽ 2022 ൽ പറഞ്ഞതാണ് ഈ കാര്യങ്ങൾ. ദേശീയപാത നിർമ്മാണത്തിലെ അശാസ്ത്രീയതയാണ് അപകടത്തിന് കാരണമെന്ന് വ്യക്തമായിരുന്നു.

2021ൽ വിഷുവിന് ഇവിടെ 2 പേർ മരിച്ചിരുന്നു. മഴ പെയ്താൽ ഇവിടുത്തെ വളവ് അപകടകേന്ദ്രമാണെന്നും നാട്ടുകാർ പറയുന്നു. ഇറക്കവും വളവുമാണ് റോഡിന്റെ ഈ ഭാഗത്തുള്ളത്. അപകടം സ്ഥിരമായപ്പോൾ ഇവിടെ റോഡിൻ്റെ വീതി കൂട്ടിയെങ്കിലും അപകടങ്ങൾക്ക് കുറവൊന്നും ഉണ്ടായിട്ടില്ല.

ഇന്നുണ്ടായ അപകടത്തിൽ ഇർഫാന, മിത, റിദ, ആയിഷ എന്നീ വിദ്യാർത്ഥികളാണ് മരിച്ചത്.

കരിമ്പ ഹയര്‍ സെക്കന്‍ഡറി സ്കൂളിലെ 8-ാം ക്ലാസ് വിദ്യാർത്ഥികളാണ് മരിച്ചത്.

മൂന്ന് കുട്ടികളുടെ മൃതദേഹം തച്ചമ്പാറ ഇസാഫ് ആശുപത്രിയിലും ഒരു കുട്ടിയുടെ മൃതദേഹം മണ്ണാർക്കാട് മദർ കെയർ ആശുപത്രിയിലും സൂക്ഷിപ്പിരിക്കുന്നു.

തച്ചമ്പാറയിലെയും മണ്ണാർക്കാട്ടെയും ആശുപത്രികളിലാണ് കുട്ടികളെ പ്രവേശിപ്പിച്ചത്. കുട്ടികളെ ആശുപത്രിയിലെത്തിക്കുമ്പോഴേക്കും മരണം സംഭവിച്ചു എന്നാണ് വിവരങ്ങൾ ലഭിക്കുന്നത്.

നാട്ടുകാരാണ് ബസിലുണ്ടായിരുന്ന വിദ്യാര്‍ത്ഥികളെ ആദ്യം രക്ഷപ്പെടുത്തി ആശുപത്രിയിലെത്തിച്ചത്. പിന്നീട് പൊലീസും സ്ഥലത്തെത്തി.

നിയന്ത്രണം വിട്ടെത്തിയ ലോറി വിദ്യാർത്ഥികൾക്ക് നേരെ പാഞ്ഞുകയറുകയായിരുന്നുവെന്ന് ദൃക്സാക്ഷികളായ നാട്ടുകാര്‍ പറഞ്ഞു.

സിമൻ്റ് കയറ്റി വന്ന ലോറിയാണ് സ്കൂൾ ബസ്സുമായി കൂട്ടിയിടിച്ചത്.

റോഡിൽ നിന്നും ലോറി നീക്കം ചെയ്തു.