റെക്കോർ‍ഡ് തകർത്ത് സ്വർണ വില കുതിക്കുന്നു; പവന് 55,840 രൂപയായി

(www.kl14onlinenews.com)

(23-Sep -2024)

റെക്കോർ‍ഡ് തകർത്ത് സ്വർണ വില കുതിക്കുന്നു; പവന് 55,840 രൂപയായി

ഫെഡറൽ റിസർവ് പലിശ നിരക്ക് കുറച്ചതിന് പിന്നാലെയുള്ള സ്വര്‍ണത്തിന്‍റെ കുതിപ്പ് തുടരുകയാണ്. കേരളത്തിൽ തിങ്കളാഴ്ച പവന് 160 രൂപയും ഗ്രാമിന് 20 രൂപയുമാണ് വര്‍ധന. പവന് 55,840 രൂപയാണ് തിങ്കളാഴ്ചത്തെ വില. ഗ്രാമിന് 6,980 രൂപ നൽകണം.ഈ മാസത്തിലെ ഉയർന്ന നിലവാരത്തിനൊപ്പം കേരളത്തിൽ ഇതുവരെ രേഖപ്പെടുത്തിയ ഏറ്റവും ഉയർന്ന വിലകൂടിയാണിത്.

ശനിയാഴ്ച പവന് 55,680 രൂപയാണ് രേഖപ്പെടുത്തിയത്. സെപ്റ്റംബർ 20 മുതൽ കുതിപ്പ് തുടരുന്ന സ്വർണം മൂന്ന് ദിവസത്തിനിടെ പവന് 1,240 രൂപ വർധിച്ചു. ഇന്നത്തെ വിലയിൽ പത്ത് ശതമാനം പണിക്കൂലിയിൽ സ്വർണാഭരണം വാങ്ങാൻ 63,000 രൂപയ്ക്ക് മുകളിൽ ചെലവാക്കണം. രാജ്യാന്തര വില കുതിപ്പ് തുടരുന്നതാണ് കേരളത്തിലും വില വർധനനയ്ക്ക് കാരണം.

അമേരിക്കയിൽ ഫെഡറൽ റിസർവ് അടിസ്ഥാന പലിശ നിരക്ക് കുറച്ചതും മധ്യേഷ്യയിൽ ഇസ്രയേലും അയൽ രാജ്യങ്ങളും തമ്മിലുള്ള സംഘർഷം കൂടുതൽ രൂക്ഷമായതും സുരക്ഷിത നിക്ഷേപമായ സ്വർണത്തിൻറെ ഡിമാൻറ് വർധിപ്പിച്ചു. പലിശ നിരക്ക് കുറച്ചതിന് പിന്നാലെ ഡോളർ ശക്തിക്ഷയിച്ചതും നവംബറിൽ നടക്കുന്ന ഫെഡറൽ റിസർവ് യോഗത്തിൽ സമാനമായ പലിശ നിരക്ക് കുറയ്ക്കാനുള്ള സാധ്യത കാണുന്നതും വില ഉയർത്തുന്നു. ശനിയാഴ്ച ഇസ്രയേലിലേക്ക് ഹിസ്ബുല്ല നടത്തിയ റോക്കറ്റ് ആക്രമണവും തിരിച്ചടിയും സ്വർണ വിലയിൽ വർധനവിന് കാരണമായി.

രാജ്യാന്തര മാർക്കറ്റിൽ 2,632.10 ഡോളറിലെത്തി പുതിയ ഉയരം കുറിച്ച സ്വർണ വില 2,629.60 ഡോളറിലാണ് വ്യാപാരം നടക്കുന്നത്. വില മുന്നേറ്റം തുടർന്നാൽ രാജ്യാന്തര വില 2,700 ഡോളറിലേക്ക് കുതിക്കാനുള്ള സാധ്യതയാണ് നിരീക്ഷകർ കാണുന്നത്. അങ്ങനെയെങ്കിൽ കേരളത്തിലും സ്വർണ വില കുതിക്കാം

ലോകത്തെ ഏറ്റവും വലിയ സ്വർണ ഉപഭോക്താക്കളാണ് ഇന്ത്യ. ഓരോ വർഷവും ടൺ കണക്കിന് സ്വർണം രാജ്യത്ത് ഇറക്കുമതി ചെയ്യപ്പെടുന്നു. അതുകൊണ്ട് ആഗോള വിപണിയിൽ സംഭവിക്കുന്ന ചെറിയ ചലനങ്ങൾ പോലും അടിസ്ഥാനപരമായി ഇന്ത്യയിലെ സ്വർണവിലയിൽ പ്രതിഫലിക്കും.

അതേസമയം, രാജ്യാന്തര വിപണിയിൽ സ്വർണത്തിന് വില കുറഞ്ഞാൽ ഇന്ത്യയിൽ വില കുറയണമെന്ന് നിർബന്ധമില്ല. രൂപയുടെ മൂല്യം, പ്രാദേശികമായ ആവശ്യകത, ഇറക്കുമതി തീരുവ എന്നീ ഘടകങ്ങൾ ഇന്ത്യയിലെ സ്വർണവില നിശ്ചയിക്കുന്നതിൽ പ്രധാന പങ്കുവഹിക്കും. നിലവിൽ പ്രാദേശികമായി പ്രവർത്തിക്കുന്ന ഗോൾഡ് അസോസിയേഷനുകളാണ് ആഭ്യന്തര വിപണിയിൽ സ്വർണത്തിന് വിലയിടുന്നത്. ആവശ്യകത അനുസരിച്ച് സ്വർണത്തിന് വിലകൂട്ടാനും വിലകുറയ്ക്കാനും അസോസിയേഷനുകൾക്ക് കഴിയും. ആവശ്യമായ സാഹചര്യങ്ങളിൽ ദിവസത്തിൽ രണ്ടുതവണ വരെ അസോസിയേഷനുകൾ വില പുതുക്കാറുണ്ട്.