ദുരിതാശ്വാസനിധിക്കെതിരെ ഫേസ്ബുക്ക് പോസ്റ്റ്; ഹെെക്കോടതിയിൽ മുൻകൂർ ജാമ്യം തേടി അഖിൽ മാരാർ

(www.kl14onlinenews.com)

(07-August -2024)

ദുരിതാശ്വാസനിധിക്കെതിരെ ഫേസ്ബുക്ക് പോസ്റ്റ്;

ഹെെക്കോടതിയിൽ മുൻകൂർ ജാമ്യം തേടി അഖിൽ മാരാർ

മുഖ്യമന്ത്രിയുടെ ദുരിതാശ്വാസനിധിക്കെതിരെ പ്രചാരണം നടത്തിയതിന് പോലീസ് എടുത്ത കേസിൽ മുന്‍കൂര്‍ ജാമ്യാപേക്ഷ തേടി സിനിമാ സംവിധായകനും ബിഗ് ബോസ് റിയാലിറ്റി ഷോ ജേതാവുമായ അഖില്‍ മാരാര്‍.

അഖിൽ മാരാരുടെ മുൻകൂർ ജാമ്യാപേക്ഷയിൽ ഹൈക്കോടതി സംസ്ഥാന സർക്കാരിൻ്റെ വിശദീകരണം തേടി.

കൊല്ലം സിറ്റി സൈബര്‍ പൊലീസാണ് കേസ് രജിസ്റ്റർ ചെയ്തിരിക്കുന്നത്.

കേസെടുത്തത് രാഷ്ട്രീയ വൈരാഗ്യം മൂലമെന്നും സിഎംഡിആര്‍എഫിനെതിരെ പ്രചാരണം നടത്തിയിട്ടില്ലെന്നും അഖില്‍ മാരാര്‍ ഹെെക്കോടതിയിൽ അറിയിച്ചു.

വയനാട് ദുരന്തത്തിൽപ്പെട്ടവരെ സഹായിക്കാൻ മുഖ്യമന്ത്രിയുടെ ദുരിതാശ്വാസനിധിയിലേക്ക് പണം കൊടുക്കാൻ താത്പര്യമില്ലെന്നാണ് അഖില്‍ സോഷ്യല്‍ മീഡിയയിലൂടെ പ്രതികരിച്ചത്.

ഇതോടെ സംഭവം വൻ വിവാദമായിരുന്നു. ഇതിനു പിന്നാലെയാണ് പോലീസ് കേസെടുത്തത്.

വയനാട് ദുരന്തത്തിൽപ്പെട്ടവരെ സഹായിക്കാൻ മുഖ്യമന്ത്രിയുടെ ദുരിതാശ്വാസനിധിയിലേക്കു പണം കൊടുക്കാൻ താൽപര്യമില്ലെന്നായിരുന്നു അഖിൽ മാരാർ ഫെയ്സ്ബുകിൽ പോസ്റ്റ് ചെയ്തത്. പകരം ദുരിതബാധിതർ പറയുന്നിടത്ത് താൻ വീടുകൾ വച്ചു നൽകുമെന്നും അഖിൽ പറഞ്ഞിരുന്നു.

കേസെടുത്തതിനു പിന്നാലെ ‘വീണ്ടും കേസ്, മഹാരാജാവ് നീണാൾ വാഴട്ടെ’ എന്നെഴുതിയ പുതിയ പോസ്റ്റും അഖിൽ മാരാർ ഫെയ്സ്ബുക്കിൽ ഇട്ടിട്ടുണ്ട്.

മുഖ്യമന്ത്രിയുടെ ദുരിതാശ്വാസ നിധിക്കെതിരെ സമൂഹ മാധ്യമങ്ങളിലൂടെ നടത്തിയ പ്രചരണത്തിന് ബിജെപി മീഡിയ വിഭാഗം മുന്‍ കോ -കണ്‍വീനർ ശ്രീജിത്ത് പന്തളത്തിനെതിരെയും പൊലീസ് കേസെടുത്തിരുന്നു.

മുണ്ടക്കയം സ്വദേശികളായ സതീഷ് ബാബു, ജിഷ, മേലുകാവ് സ്വദേശി റിജിൽ ചാക്കോ ഉൾപ്പെടെയുള്ളവരും അറസ്റ്റിലായിരുന്നു.