റായ്ബറേലിയിൽ നിന്നുള്ള മത്സരം; രാഹുൽ കൈവിടില്ലെന്ന പ്രതീക്ഷയിൽ വയനാട്

(www.kl14onlinenews.com)

(04-May-2024)

റായ്ബറേലിയിൽ നിന്നുള്ള മത്സരം; രാഹുൽ കൈവിടില്ലെന്ന പ്രതീക്ഷയിൽ വയനാട്

വയനാട്: ഊഹാപോഹങ്ങൾക്ക് വിരാമമിട്ടുകൊണ്ട് കോൺഗ്രസ് നേതാവ് രാഹുൽ ഗാന്ധി വെള്ളിയാഴ്ച ഉത്തർപ്രദേശിലെ റായ്ബറേലിയിൽ നിന്ന് നാമനിർദ്ദേശ പത്രിക സമർപ്പിച്ചപ്പോഴും രാഹുലിൽ പ്രതീക്ഷ അർപ്പിക്കുകയാണ് വയനാട്. 2019ൽ കേന്ദ്രമന്ത്രി സ്മൃതി ഇറാനിയോട് അമേഠിയിൽ പരാജയപ്പെട്ടപ്പോൾ വൻ ഭൂരിപക്ഷം നൽകി തന്നെ നെഞ്ചോട് ചേർത്ത വയനാടിനെ രാഹുൽ റായ്ബറേലിയിൽ ജയിച്ചാലും കൈവിടില്ലെന്ന പ്രതീക്ഷയാണ് നാട് പങ്കുവെക്കുന്നത്.

നെഹ്‌റു-ഗാന്ധി കുടുംബവുമായി അഭേദ്യമായ ബന്ധമുള്ള റായ്ബറേലിയിൽ രാഹുൽ മത്സരിക്കുമെന്ന് കോൺഗ്രസ് പ്രഖ്യാപിച്ചതോടെ ബിജെപിയും ഇടതുപക്ഷവും ഇതിനെ വയനാട്ടിലെ ജനങ്ങളോടുള്ള വഞ്ചനയെന്നാണ് വിശേഷിപ്പിച്ചത്. വയനാട്ടിലെ തന്റെ പ്രചാരണ വേളയിൽ, യുപിയിൽ മത്സരിക്കുന്നതിനെക്കുറിച്ച് രാഹുൽ ഒരു സൂചനയും നൽകിയിരുന്നില്ല. തിരഞ്ഞെടുപ്പ് പ്രചാരണ വേളയിൽ തന്നെ രാഹുലിന്റെ വയനാട്ടിലേക്കുള്ള രണ്ടാം വരവിനെ എതിർത്ത ഇടതുപക്ഷം അദ്ദേഹം ബിജെപിയെ ഭയന്ന് ഉത്തരേന്ത്യയിൽ നിന്നും ഒളിച്ചോടിയെന്നായിരുന്നു പരിഹസിച്ചത്.

റായ്ബറേലിയിൽ വിജയിച്ചാലും രാഹുൽ മണ്ഡലം നിലനിർത്തുമെന്നാണ് വയനാട്ടിലെ ജനങ്ങളുടെ പൊതുധാരണ. 2019ലെ തിരഞ്ഞെടുപ്പിൽ രാഹുലിനെ രക്ഷിച്ചത് വയനാടാണെന്നാണ് വയനാട്ടിലെ പുൽപ്പള്ളിയിലെ കർഷകനായ എം വി പൗലോസിന്റെ അഭിപ്രായം. റായ്ബറേലിയിൽ നിന്ന് വിജയിച്ചാൽ അദ്ദേഹം ഈ സീറ്റ് നിലനിർത്തുമെന്ന് ഞങ്ങൾ പ്രതീക്ഷിക്കുന്നു. കോൺഗ്രസിന് എന്നും സുരക്ഷിതമായ സീറ്റായ വയനാട്ടിൽ അദ്ദേഹം വിജയിക്കുമെന്ന് ഉറപ്പാണ്. റായ്ബറേലിയിൽ രാഹുൽ മത്സരിക്കുന്നതിനോട് ജനങ്ങൾക്ക് എതിർപ്പില്ല. കഴിഞ്ഞ തവണയും അദ്ദേഹം രണ്ട് സീറ്റിൽ മത്സരിച്ചെങ്കിലും അത് വയനാട്ടിലെ ഫലത്തെ ബാധിച്ചില്ലെന്നും അദ്ദേഹം പറഞ്ഞു.

രാഹുൽ ഇത്തവണ വയനാട്ടിൽ പ്രചാരണത്തിനെത്തിയപ്പോൾ, ജനങ്ങളുടെ കുടുംബാംഗം-വയനാടിന്റെ സഹോദരനും മകനും എന്ന് വിളിച്ച് വോട്ടർമാരിൽ ഇടംപിടിക്കാൻ ശ്രമിച്ചു. അദ്ദേഹത്തിന്റെ പ്രചാരണ റാലികളിലും റോഡ്‌ഷോകളിലും കോൺഗ്രസിന്റേയോ മുസ്‌ലിം ലീഗിന്റെയോമറ്റ് ഏതെങ്കിലും ഘടകകക്ഷിയുടെയോ പതാകകൾ ഇല്ലായിരുന്നു എന്നതും ശ്രദ്ധേയമാണ്

റായ്ബറേലിയിൽ മത്സരിക്കാനുള്ള രാഹുലിന്റെ തീരുമാനത്തെ വയനാട്ടിലെ മുട്ടിലിലെ ലീഗ് പ്രവർത്തകൻ എം കെ അലി സ്വാഗതം ചെയ്തു. 'രാഹുലിന്റെ തീരുമാനത്തെക്കുറിച്ച് പലരും ചർച്ച ചെയ്യുന്നുണ്ട്. ബി.ജെ.പിയുടെ പ്രചാരണത്തിന് ഉചിതമായ മറുപടിയായതിനാൽ മിക്കവരും ഇതിനെ സ്വാഗതം ചെയ്തു. രാഹുൽ റായ്ബറേലിയിൽ നിന്ന് മത്സരിക്കുന്നത് ഇന്ത്യാ സഖ്യത്തെ കുറച്ച് സീറ്റുകൾ കൂടി നേടാൻ സഹായിച്ചാൽ നമ്മൾ എന്തിന് എതിർക്കണം? വയനാട്ടിൽ മത്സരിക്കാനെത്തിയപ്പോൾ തന്നെ അദ്ദേഹം മറ്റൊരു സീറ്റിൽ മത്സരിച്ചേക്കുമെന്ന് അഭ്യൂഹമുണ്ടായിരുന്നു. വയനാട് രാഹുലിന് ഉറപ്പാണ് . റായ്ബറേലിയിൽ എന്ത് സംഭവിക്കുമെന്ന് ഞങ്ങൾക്ക് അറിയില്ല, പക്ഷേ അദ്ദേഹത്തിന് വയനാട് ഉപേക്ഷിക്കാൻ കഴിയില്ല, ”അദ്ദേഹം പറഞ്ഞു.

“വയനാടാണ് തന്റെ രണ്ടാമത്തെ വീടാണെന്ന് രാഹുൽ എപ്പോഴും അവകാശപ്പെടുന്നത്. അങ്ങനെ പോയാൽ ഈ സീറ്റ് നിലനിർത്തേണ്ടി വരും. സീറ്റിനോടുള്ള കുടുംബത്തിന്റെ വൈകാരിക അടുപ്പമുണ്ടായിട്ടും അമേഠി അദ്ദേഹത്തെ പിന്തുണയ്ക്കാതിരുന്നപ്പോൾ വയനാട്ടിലെ ജനങ്ങൾ അദ്ദേഹത്തിന് വൻ വിജയം ഉറപ്പാക്കി. അദ്ദേഹം ഒരു ദേശീയ നേതാവാണ്, ദേശീയ രാഷ്ട്രീയ സാഹചര്യം ജനങ്ങൾ മനസ്സിലാക്കുന്നു. അതിനാൽ, ആളുകൾ അദ്ദേഹത്തിന്റെ തീരുമാനത്തെ പിന്തുണയ്ക്കുമെന്ന് ഞാൻ കരുതുന്നു, മുള്ളൻകൊല്ലി പഞ്ചായത്തിലെ സ്വതന്ത്ര അംഗം ജോസ് നെല്ലേടം പറഞ്ഞു,.

രാഹുൽ വയനാട് നിലനിർത്തുമെന്ന് പ്രതീക്ഷിക്കുന്നതായി മേപ്പാടി സ്വദേശി ഹുസൈനും പറഞ്ഞു. ഞങ്ങൾ അദ്ദേഹത്തെ സ്നേഹിക്കുന്നു. മണ്ഡലത്തിലെ പാവപ്പെട്ടവർക്കായി അദ്ദേഹം ഒരുപാട് കാര്യങ്ങൾ ചെയ്തിട്ടുണ്ട്," അദ്ദേഹം പറഞ്ഞു.