എയർ ഇന്ത്യ എക്സ്പ്രസ് ജീവനക്കാർ സമരം പിൻവലിച്ചു; പിരിച്ചുവിട്ടവരെ തിരിച്ചെടുക്കും

(www.kl14onlinenews.com)

(09-May-2024)

എയർ ഇന്ത്യ എക്സ്പ്രസ് ജീവനക്കാർ സമരം പിൻവലിച്ചു; പിരിച്ചുവിട്ടവരെ തിരിച്ചെടുക്കും

പിരിച്ചുവിട്ട എല്ലാ ക്യാബിൻ ക്രൂ അംഗങ്ങളെയും ഉടൻ തിരിച്ചെടുക്കാൻ എയർ ഇന്ത്യ എക്സ്പ്രസ് സമ്മതിച്ചു. വ്യാഴാഴ്ച ഉച്ചയ്ക്ക് രണ്ട് മണിക്ക് ചീഫ് ലേബർ കമ്മീഷണർ വിളിച്ചുചേർത്ത എയർ ഇന്ത്യ എക്‌സ്പ്രസ് മാനേജ്‌മെൻ്റിൻ്റെയും പ്രതിഷേധിച്ച ജീവനക്കാരുടെയും യോഗത്തിലാണ് തീരുമാനം.

മുൻകൂർ അനുമതിയില്ലാതെ നിരവധി ജീവനക്കാർ അവധിയിൽ പ്രവേശിച്ചതിന് തുടർന്ന് ചൊവ്വാഴ്‌ച രാത്രി മുതൽ 100-ലധികം ഏയർ ഇന്ത്യാ എക്സ്പ്രസ് ഫ്‌ളൈറ്റുകൾ റദ്ദാക്കിയിരുന്നു. കൂട്ട അവധിയിൽ പോയ 30 ക്യാബിൻ ക്രൂ അംഗങ്ങളുടെ സേവനം അവസാനിപ്പിക്കുന്നതായി എയർലൈൻ പ്രഖ്യാപിച്ച് മണിക്കൂറുകൾക്ക് ശേഷമാണ് ഈ നീക്കം.

ടാറ്റാ ഗ്രൂപ്പ് ഏറ്റെടുത്തതിന് പിന്നാലെ യോഗ്യതക്ക് അനുസരിച്ചുള്ള വേതനം ലഭിക്കുന്നില്ലെന്ന കാര്യമടക്കം ചൂണ്ടിക്കാട്ടിയായിരുന്നു ജീവനക്കാരുടെ സമരം

അനുമതിയില്ലാതെ അവധിയെടുത്ത ജീവനക്കാർ വ്യാഴാഴ്ച വൈകുന്നേരം 4 മണിക്ക് വീണ്ടും ഡ്യൂട്ടിയിൽ എത്തണമെന്നും അല്ലെങ്കിൽ ജോലി നഷ്ടമാകുമെന്നും എയർലൈൻ അന്ത്യശാസനം നൽകിയതായി വാർത്താ ഏജൻസിയായ പിടിഐ റിപ്പോർട്ട് ചെയ്തു

മുൻകൂർ അറിയിപ്പൊന്നും കൂടാതെ എയർ ഇന്ത്യ എക്സ്പ്രസിൻ്റെ ജീവനക്കാർ ഒരേ സമയം അവധി എടുത്തതിനെ തുടർന്ന് നിരവധി വിമാനങ്ങൾ വൈകുകയും റദ്ദാക്കുകയും ചെയ്തു. ഇതെതുടർന്ന് കേരളത്തിലെയുൾപ്പടെ നിരവധി യാത്രക്കാരും വിമാനത്താവളങ്ങളിൽ കുടുങ്ങി.

എയർലൈൻ കമ്പനി പിന്നീട് പുതുക്കിയ ഫ്ലൈറ്റ് ഷെഡ്യൂൾ പുറത്തിറക്കുകയും വിമാനത്താവളത്തിലേക്ക് പോകുന്നതിന് മുമ്പ് തങ്ങളുടെ വിമാന സർവ്വീസ് ഉണ്ടോയെന്ന് പരിശോധിക്കാൻ ആളുകളോട് ആവശ്യപ്പെടുകയും ചെയ്തു.

"യാത്രക്കാരെ എത്രയും വേഗം ലക്ഷ്യസ്ഥാനത്ത് എത്തിക്കാൻ ഗ്രൂപ്പ് എയർലൈനുകൾ ഉൾപ്പെടെയുള്ള ഇതര ഫ്ലൈറ്റുകളിൽ യാത്ര ചെയ്യാനുള്ള അവസരം ഞങ്ങളൊരുക്കി" എയർലൈൻ പ്രസ്താവനയിൽ പറഞ്ഞു.

വ്യാഴാഴ്ച എയർ ഇന്ത്യ എക്‌സ്പ്രസിൻ്റെ 85 വിമാനങ്ങൾ റദ്ദാക്കിയതായി അറിയിച്ചു. ക്യാബിൻ ക്രൂവിൻ്റെ കുറവിനെത്തുടർന്ന് അതിൻ്റെ പ്രതിദിനം ഷെഡ്യൂൾ ചെയ്ത വിമാനങ്ങളുടെ 20 ശതമാനത്തെ ബാധിച്ചു.

വ്യാഴാഴ്ച 20 റൂട്ടുകളിൽ എയർ ഇന്ത്യയുടെ സഹായത്തോടെ 283 വിമാനങ്ങൾ സർവീസ് നടത്തുമെന്നും എയർലൈൻ അറിയിച്ചു