14 കോടിയുടെ സ്വത്ത്, കൈയ്യിൽ 50000 രൂപ; പത്രിക സമർപ്പിച്ച് മുകേഷ്, ആദ്യ ഘട്ടത്തിൽ എത്തിയത് 14 പത്രികകൾ

(www.kl14onlinenews.com)

(29-MAR-2024)

14 കോടിയുടെ സ്വത്ത്, കൈയ്യിൽ 50000 രൂപ; പത്രിക സമർപ്പിച്ച് മുകേഷ്, ആദ്യ ഘട്ടത്തിൽ എത്തിയത് 14 പത്രികകൾ

സംസ്ഥാനത്ത് ഇന്നലെ മുതൽ ലോക്സഭ തിരഞ്ഞെടുപ്പിനായുള്ള പത്രിക സമർപ്പണം ആരംഭിച്ചു. ആദ്യ ദിനത്തിൽ 14 സ്ഥാനാർത്ഥികളാണ് പത്രിക സമർപ്പിക്കാൻ എത്തിയത്. തിരുവനന്തപുരം- 4, കൊല്ലം– 3 , മാവേലിക്കര- 1, കോട്ടയം- 1, എറണാകുളം- 1, തൃശൂർ- 1, കോഴിക്കോട്- 1, കാസർഗോഡ്- 2. കൊല്ലം, കോഴിക്കോട് ജില്ലകളിൽ ഓരോ സ്ഥാനാർഥികൾ രണ്ട് പത്രികകൾ വീതവും കാസർഗോഡ് ഒരാൾ മൂന്നു പത്രികയും സമർപ്പിച്ചതായാണ് മണ്ഡലം തിരിച്ചുള്ള കണക്ക്.

കൊല്ലം മണ്ഡലത്തിലെ എൽഡിഎഫ് സ്ഥാനാർത്ഥിയും നടനുമായ മുകേഷും ആദ്യം പത്രിക സമർപ്പിച്ചവരുടെ പട്ടികയിലുണ്ട്. മുകേഷിന് 14.98 കോടിയുടെ സ്വത്തുക്കളുണ്ടെന്നാണ് സത്യവാങ്മൂലത്തിൽ പറയുന്നത്. ആകെ സ്വത്തുക്കളുടെ മൂല്യം 14,98,08,376 രൂപ. താമസിക്കുന്ന വീട് ഉൾപ്പെടെ 230 സെന്റ് ഭൂമിയുടെയും ചെന്നൈയിലെ 2 ഫ്ലാറ്റുകളുടെയും വിപണി മൂല്യമായി കണക്കാക്കിയിരിക്കുന്നത് 4,49,50,000 രൂപയാണ്. 2,40,000 രൂപ മൂല്യം വരുന്ന സ്വർണവുമുണ്ട്.

ചെന്നൈ ടി നഗറിലെ ഫ്ലാറ്റ് മുകേഷിൻ്റേയും ആദ്യ ഭാര്യ സരിതയുടെയും പേരിലാണ്. മുകേഷിൻ്റേയും ഭാര്യ മേതിൽ ദേവികയുടെയും പേരിൽ 13 സെന്റ് വസ്തു തിരുവനന്തപുരം കടകംപള്ളി വില്ലേജിലുണ്ട്. ബിഎംഡബ്ല്യു, മഹീന്ദ്ര എക്സ്‌യുവി എന്നീ രണ്ടു കാറുകളും സ്വന്തമായുണ്ട്. പത്രികയ്ക്കൊപ്പം സമർപ്പിച്ച സത്യവാങ്മൂലത്തിൽ ഒരു കേസുണ്ടെന്നും പറയുന്നു. പുനലൂർ പൊലീസ് സ്റ്റേഷനിൽ 2014ൽ റജിസ്റ്റർ ചെയ്ത കേസ് പുനലൂർ മജിസ്ട്രേട്ട് കോടതിയുടെ പരിഗണനയിലാണ്.