'ഭാരത് ജോഡോ ന്യായ് യാത്ര'യുടെ ലോഗോ പുറത്തിറക്കി, നീതി ലഭിക്കുന്നതുവരെ യാത്ര തുടരുമെന്ന് രാഹുൽ ഗാന്ധി

(www.kl14onlinenews.com)

(06-JAN-2024)

'ഭാരത് ജോഡോ ന്യായ് യാത്ര'യുടെ ലോഗോ പുറത്തിറക്കി, നീതി ലഭിക്കുന്നതുവരെ യാത്ര തുടരുമെന്ന് രാഹുൽ ഗാന്ധി

കോൺഗ്രസ് (congress) നയിക്കുന്ന 'ഭാരത് ജോഡോ ന്യായ് യാത്ര'യുടെ (Bharat Jodo Nyay Yatra) ലോഗോയും ടാഗ്‌ലൈനും പ്രകാശനം ചെയ്തു. കോൺഗ്രസ് നേതാവ് രാഹുൽ ഗാന്ധി നയിക്കുന്ന യാത്ര ജനുവരി 14 ന് മണിപ്പൂരിൽ നിന്നാണ് ആരംഭിക്കുക. 'ന്യായ് യാത്ര’ രാജ്യത്തിന്റെ സാമൂഹിക, രാഷ്ട്രീയ, സാമ്പത്തിക വിഷയങ്ങളിൽ ശ്രദ്ധ കേന്ദ്രീകരിക്കും. പാർട്ടി അധ്യക്ഷൻ മല്ലികാർജുൻ ഖാർഗെ ശനിയാഴ്ച വാർത്താസമ്മേളനത്തിലാണ് ഇക്കാര്യം അറിയിച്ചത്. ഭാരത് ജോഡോ ന്യായ് യാത്രയുടെ ലോഗോയും ടാഗ്‌ലൈനും അദ്ദേഹം പുറത്തിറക്കി.

'അനീതിയ്ക്കെതിരെ - നീതിയുടെ ആഹ്വാനവുമായി ഞങ്ങൾ നമ്മുടെ സ്വന്തം ആളുകൾക്കിടയിൽ വീണ്ടും വരുന്നു. സത്യത്തിന്റെ ഈ പാതയിൽ ഞാൻ സത്യം ചെയ്യുന്നു, നീതി ലഭിക്കുന്നതുവരെ യാത്ര തുടരും." യാത്രയുടെ ലോഗോയും ടാഗ്‌ലൈനും പങ്കുവച്ചുകൊണ്ട് രാഹുൽ ഗാന്ധി തന്റെ എക്‌സിൽ കുറിച്ചു. രാഹുൽ ഗാന്ധിയുടെ ഭാരത് ജോഡോ ന്യായ് യാത്ര 67 ദിവസം കൊണ്ട് 6700 കിലോമീറ്ററിലധികം ദൂരം പിന്നിടും.

രാഹുൽ ഗാന്ധിയുടെ നേതൃത്വത്തിൽ മണിപ്പൂരിലെ ഇംഫാലിൽ നിന്ന് ആരംഭിക്കുന്ന യാത്ര രാജ്യത്തെ 15 സംസ്ഥാനങ്ങളിലൂടെ കടന്ന് മുംബൈയിൽ സമാപിക്കും. 110 ജില്ലകൾ, 100 ലോക്‌സഭാ സീറ്റുകൾ, 337 നിയമസഭാ സീറ്റുകൾ എന്നിവിടങ്ങളിലാണ് യാത്ര. ഇപ്പോൾ ഈ യാത്രയുടെ റൂട്ടിൽ അരുണാചൽ പ്രദേശും ഉൾപ്പെടുത്തിയിട്ടുണ്ട്.

കന്യാകുമാരി മുതൽ കാശ്മീർ വരെയുള്ള രാഹുൽ ഗാന്ധിയുടെ ഭാരത് ജോഡോ യാത്ര പോലെ രാഷ്ട്രീയത്തിന് മാറ്റമുണ്ടാക്കാൻ ഭാരത് ജോഡോ ന്യായ യാത്രയ്ക്കും കഴിയുമെന്ന് മുതിർന്ന കോൺഗ്രസ് നേതാവ് ജയറാം രമേശ് പറഞ്ഞു. കഴിഞ്ഞ വർഷം സെപ്റ്റംബർ 7 ന് കന്യാകുമാരിയിൽ നിന്ന് ആരംഭിച്ച ഭാരത് ജോഡോ യാത്ര ജനുവരി 30 ന് ജമ്മു കശ്മീരിലെ ശ്രീനഗറിലെ ലാൽ ചൗക്കിലാണ് സമാപിച്ചത്. ഈ യാത്ര 12 സംസ്ഥാനങ്ങളിലും 2 കേന്ദ്രഭരണ പ്രദേശങ്ങളിലും എത്തിയിരുന്നു. 4000 കിലോമീറ്ററിലധികം ദൂരം രാഹുൽഗാന്ധി ഈ യാത്രയിലൂടെ സഞ്ചരിച്ചിരുന്നു.

അതേസമയം യാത്ര ജനുവരി 14ന് മണിപ്പൂരിലെ ഇംഫാലിൽ നിന്ന് ആരംഭിക്കുമെന്നും അദ്ദേഹം അറിയിച്ചു. മണിപ്പൂർ, ‌നാഗാലാൻഡ്,‌ അരുണാചൽ പ്രദേശ് വഴി അസമിലേക്ക് യാത്ര നീങ്ങുമെന്ന് മല്ലികാർജുൻ ഖാർഗെ നേരത്തെ വ്യക്തമാക്കിയിരുന്നു. മൊത്തത്തിൽ 6700 കിലോമീറ്റർ ദൂരമാണ് യാത്ര പിന്നിടുക. എല്ലാ ദിവസവും രാഹുല് ഗാന്ധി സമൂഹത്തിന്റെ എല്ലാ കോണുകളിലുള്ള ആളുകളുമായും കൂടിക്കാഴ്ച നടത്തും. നേരത്തെ, 14 സംസ്ഥാനങ്ങളിലൂടെ യാത്ര നടത്തുമെന്നാണ് അറിയിച്ചിരുന്നത്. എന്നാൽ അരുണാചൽ പ്രദേശ് കൂടി ഉൾപ്പെടുത്തി ഇത് 15 ആക്കി.