(www.kl14onlinenews.com)
(01-Sep-2023)
ചരിത്രത്തിൽ ആദ്യമായി റെയിൽവേ ബോർഡിന് ഒരു വനിതാ മേധാവി
ഡൽഹി :
റെയിൽവേ ബോർഡിന്റെ പുതിയ ചെയർപേഴ്‌സണും ചീഫ് എക്‌സിക്യൂട്ടീവ് ഓഫീസറും (സിഇഒ) ആയി ജയ വർമ സിൻഹയെ കേന്ദ്ര സർക്കാർ നിയമിച്ചത് കഴിഞ്ഞ ദിവസമാണ്. 166 വർഷത്തെ ചരിത്രത്തിൽ റെയിൽവേ ബോർഡിന്റെ തലപ്പത്തെത്തുന്ന ആദ്യ വനിതയാണ് അവർ.
ഇന്ത്യൻ റെയിൽവേയുടെ കാര്യങ്ങളിൽ തീരുമാനമെടുക്കുന്ന സ്ഥാപനമാണ് റെയിൽവേ ബോർഡ്. അനിൽ കുമാർ ലഹോട്ടിയുടെ പിൻഗാമിയായി ചുമതല ഏൽക്കുന്ന സിൻഹ ചരക്ക്, യാത്രാ സേവനങ്ങളുടെ മൊത്തത്തിലുള്ള ഗതാഗതത്തിന്റെ മേൽനോട്ടം വഹിക്കും. സിഇഒ ആയി നിയമിക്കുന്നതിന് മുമ്പ്, റെയിൽവേ ബോർഡിൽ ട്രാഫിക് ട്രാൻസ്പോർട്ടേഷൻ അഡീഷണൽ മെമ്പർ പദവിയാണ് അവർ വഹിച്ചിരുന്നത്.
1988ൽ ഇന്ത്യൻ റെയിൽവേ ട്രാഫിക് സർവീസ് (ഐആർടിഎസ്) ഉദ്യോഗസ്ഥയായി ചേർന്നതോടെയാണ് സിൻഹ തന്റെ ഇന്ത്യൻ റെയിൽവേയ്‌ക്കൊപ്പമുള്ള യാത്ര ആരംഭിച്ചത്. തന്റെ 35 വർഷത്തെ കരിയറിൽ, ഓപ്പറേഷൻസ്, ഇൻഫർമേഷൻ ടെക്നോളജി, കൊമേഴ്‌സ്യൽ, വിജിലൻസ് തുടങ്ങി വിവിധ തലങ്ങളിൽ അവർ സേവനമനുഷ്ഠിച്ചിട്ടുണ്ട്.
നോർത്തേൺ റെയിൽവേയുടെ പ്രിൻസിപ്പൽ ചീഫ് കൊമേഴ്‌സ്യൽ മാനേജരായും സീൽദാ ഡിവിഷന്റെ ഡിവിഷണൽ റെയിൽവേ മാനേജരായും അവർ ചുമതല വഹിച്ചിരുന്നു. ബംഗ്ലാദേശിലെ ധാക്കയിലുള്ള ഇന്ത്യൻ ഹൈക്കമ്മീഷനിൽ സിൻഹ റെയിൽവേ ഉപദേഷ്ടാവായി പ്രവർത്തിച്ച സമയത്താണ് കൊൽക്കത്തയ്ക്കും ധാക്കയ്ക്കുമിടയിൽ മൈത്രി എക്‌സ്പ്രസ് സർവീസ് ആരംഭിച്ചത്.
സൗത്ത് ഈസ്‌റ്റേൺ റെയിൽവേയുടെ പ്രിൻസിപ്പൽ ചീഫ് ഓപ്പറേഷൻസ് മാനേജരായി നിയമിതയായ ആദ്യ വനിത കൂടിയാണ് അവർ. 1988 ബാച്ചിലെ ഐആർടിഎസ് ഉദ്യോഗസ്ഥയായ സിൻഹ അലഹബാദ് സർവകലാശാലയിലെ പൂർവ വിദ്യാർഥിയാണ്
Post a Comment