(www.kl14onlinenews.com)
(26-Sep-2023)
കാവേരി നദീജല തര്ക്കം:
ബെംഗളൂരു: തമിഴ്നാടിന് കാവേരി വെള്ളം വിട്ടുനൽകാനുള്ള ഉത്തരവിനെതിരെ കര്ഷക സംഘടനകളുടെ കൂട്ടായ്മയായ കര്ണാടക ജലസംരക്ഷണ സമിതി ബെംഗളൂരുവില് ആഹ്വാനം ചെയ്ത ബന്ദ് തുടങ്ങി. തമിഴ്നാട്ടിൽ നിന്നുള്ള ബസുകൾ തടഞ്ഞു.
ചൊവ്വാഴ്ച രാവിലെ ആറു മുതലാണ് ബന്ദ് തുടങ്ങിയത്. ബന്ദിനെതുടര്ന്ന് അക്രമസംഭവങ്ങള് ഒഴിവാക്കുന്നതിനായി ബെംഗളൂരു പോലീസ് നഗരത്തില് നിരോധനാജ്ഞ പ്രഖ്യാപിച്ചു.
ചൊവ്വാഴ്ച അര്ധരാത്രിവരെയാണ് ബെംഗളൂരു നഗരത്തില് നിരോധനാജ്ഞ പ്രഖ്യാപിച്ചിരിക്കുന്നത്. അഞ്ചിലധികം ആളുകള് കൂട്ടം കൂടരുതെന്നും ക്രമസമാധനം ഉറപ്പാക്കുമെന്നും എല്ലായിടത്തും പോലീസ് അതീവ ജാഗ്രത പുലര്ത്തുമെന്നും ബെംഗളൂരു സിറ്റി പോലീസ് കമീഷണര് ബി.ദയാനന്ദ പറഞ്ഞു. വൈകിട്ട് ആറുവരെയാണ് ബന്ദ്. ബന്ദിനെ തുടര്ന്ന് ബെംഗളൂരുവില് ഭൂരിഭാഗം സ്കൂളുകള്ക്കും കോളജുകള്ക്കും ചൊവ്വാഴ്ച അവധി നല്കിയിട്ടുണ്ട്. ബെംഗളുരുവിലെ ഓട്ടോ-ടാക്സി യൂണിയനുകളും സർക്കാർ, സ്വകാര്യ ബസ് യൂണിയനുകളും ഇന്നത്തെ ബന്ദിന് പിന്തുണ പ്രഖ്യാപിച്ചിട്ടുണ്ട്.
Post a Comment