ലോക അത്‌ലറ്റിക് ചാംപ്യൻഷിപ്പ്: ഇന്ത്യയുടെ ആദ്യ സ്വർണമെഡൽ നേടി നീരജ് ചോപ്ര

(www.kl14onlinenews.com)

(28-Aug-2023)

ലോക അത്‌ലറ്റിക് ചാംപ്യൻഷിപ്പ്: ഇന്ത്യയുടെ ആദ്യ സ്വർണമെഡൽ നേടി നീരജ് ചോപ്ര

ബുഡാപെസ്റ്റ് : ഇന്ത്യൻ കായിക ചരിത്രത്തിൽ സുവർണ ചരിത്രമെഴുതി ലോക അത്‌ലറ്റിക്സ് പുരുഷ ജാവലിൻത്രോയിൽ നീരജ് ചോപ്രയ്ക്കു സ്വർണം. ഫൈനലിലെ രണ്ടാം ത്രോയിൽ 88.17 മീറ്റർ പിന്നിട്ടാണ് നീരജ് സ്വർണത്തിലെത്തിയത്. ലോക അത്‌ലറ്റിക്സ് ചാംപ്യൻഷിപ്പിൽ സ്വർണം നേടുന്ന ആദ്യ ഇന്ത്യക്കാരനാണ് നീരജ്.

ഫൈനലിലെ മറ്റു ഇന്ത്യൻ താരങ്ങളായ കിഷോർ കുമാർ ജന 5–ാം സ്ഥാനത്തും (84.77 മീറ്റർ) ഡി.പി.മനു (84.14 മീറ്റർ) 6–ാം സ്ഥാനത്തുമെത്തി. പാക്കിസ്ഥാന്റെ അർഷാദ് നദീമിനാണ് വെള്ളി (87.82 മീറ്റർ). ചെക്ക് റിപ്പബ്ലിക്കിന്റെ യാക്കൂബ് വാൽഡെജ് വെങ്കലം നേടി (86.67 മീറ്റർ). കഴിഞ്ഞ വർഷത്തെ വെള്ളി മെഡൽ നേട്ടം മെച്ചപ്പെടുത്തിയാണ് നീരജിന്റെ സുവർണ പ്രകടനം.

ഒരേസമയം ഒളിംപിക് സ്വർണവും ലോകചാംപ്യൻഷിപ് സ്വർണവും കൈവശം വയ്ക്കുന്ന മൂന്നാമത്തെ ജാവലിൻത്രോ താരമെന്ന നേട്ടവും നീരജ് സ്വന്തമാക്കി. അതേസമയം പുരുഷ റിലേ ഫൈനലിൽ ഇന്ത്യ അഞ്ചാം സ്ഥാനത്തായി. രണ്ട് മിനിറ്റ് 59.92 സെക്കൻ‍‍ഡിലാണ് ഇന്ത്യ ഫിനിഷ് ചെയ്തത്. 57.31 സെക്കൻഡിൽ ഫിനിഷ് ചെയ്ത് യുഎസ് റിലേയിൽ സ്വര്‍ണം നേടി. ഫ്രാൻസിനാണു വെള്ളി.

വെല്ലുവിളിയിൽ ഏറ്റവും അടുത്തെത്തിയത് പാക്കിസ്ഥാന്റെ അർഷാദ് നദീമാണ്. 90 മീറ്റർ പ്ലസ് എറിഞ്ഞാണ് നദീം കോമൺവെൽത്ത് ഗെയിംസ് സ്വർണം നേടിയത്. 74.80 മീറ്ററുമായി സാവധാനത്തിൽ തുടങ്ങിയ നദീം 82.18 ലേക്ക് നീങ്ങി, തുടർന്ന് തന്റെ മികച്ച 87.82 ലേക്ക് എത്തി രണ്ടാം സ്ഥാനത്തെത്തി.

കിഷോർ ജെനയുടെ (84.77 മീറ്റർ) അഞ്ചാം സ്ഥാനവും ഡിപി മനുവിന്റെ (84.14) ആറാം സ്ഥാനവുമാണ് ഇന്ത്യൻ ജാവലിന് ഞായറാഴ്ച മികച്ച ദിനമാക്കിയത്. ചെക്ക് റിപ്പബ്ലിക്കിന്റെ ജാക്കൂബ് വാഡ്‌ലെച്ച് 86.67 മീറ്റർ എറിഞ്ഞ് വെങ്കലം നേടി.