അഹമ്മദാബാദില്‍ ഗില്ലാട്ടം;ന്യൂസിലൻഡിനെതിരെ റൺമല തീർത്ത് ഇന്ത്യ

(www.kl14onlinenews.com)
(01-FEB-2023)

അഹമ്മദാബാദില്‍ ഗില്ലാട്ടം;ന്യൂസിലൻഡിനെതിരെ റൺമല തീർത്ത് ഇന്ത്യ
അഹമ്മദാബാദ്:
ന്യൂസിലൻഡിന് എതിരായ മൂന്നാം ടി20യിൽ തകർത്തടിച്ച് ഇന്ത്യൻ യുവനിര. ഓപ്പണർ ശുഭ്മാൻ ഗിൽ കന്നി സെഞ്ചുറി നേടി അഭിമാനമായപ്പോൾ ഇന്നിംഗ്‌സിന് കരുത്ത് പകർന്ന് മൂന്നാം നമ്പറായി ഇറങ്ങിയ രാഹുൽ ത്രിപാതി കൂടി ചേർന്നതോടെ ഇന്ത്യ ന്യൂസിലൻഡിന് മുന്നിൽ കൂറ്റൻ വിജയ ലക്ഷ്യം ഉയർത്തി. നാല് വിക്കറ്റ് നഷ്‌ടത്തിൽ 234 റൺസാണ് ഇന്ത്യ അടിച്ചുകൂട്ടിയത്.
പതിവിലും മെല്ലെയാണ് ഗിൽ ബാറ്റിങ് തുടങ്ങിയതെങ്കിൽ മധ്യ-അവസാന ഓവറുകളിൽ തന്റെ സ്ഫോടനാത്മകത മുഴുവനും പുറത്തെടുത്തതോടെ കിവീസ് ബൗളർമാർ ശരിക്കും വിയർത്തു. വെറും 54 പന്തുകളിലാണ് ഗിൽ തന്റെ സെഞ്ചുറി സ്വന്തമാക്കിയത്. ഒരു ഇന്ത്യൻ താരത്തിന്റെ ഏറ്റവും ഉയർന്ന ടി20 സ്‌കോർ എന്ന കോഹ്ലിയുടെ റെക്കോർഡും ഗിൽ ഇന്ന് മറികടന്നു. 63 പന്തിൽ 126 റൺസ് നേടിയ ഗിൽ പുറത്താവാതെ നിന്നു.

പതിനാറാം ഓവറിൽ ലിസ്‌റ്ററിനെ സിക്‌സർ പായിച്ച ഗില്ലിന്റെ ഷോട്ട് കാണികളെ അക്ഷരാർത്ഥത്തിൽ കോരി തരിപ്പിച്ചു എന്ന് വേണം പറയാൻ. ആദ്യ അമ്പതിലേക്ക് മെല്ലെയടുത്ത ഗിൽ എന്നാൽ സെഞ്ചുറിയിലേക്ക് അതിവേഗം നടന്നടുത്തു. വിരാട് കോഹ്ലിയും രോഹിത് ശർമ്മയുമില്ലാത്ത, താരതമ്യേന പരിചയ സമ്പന്നത കുറഞ്ഞ യുവനിര തകർത്തടിച്ചതോടെ ഇന്ത്യൻ ക്രിക്കറ്റിന്റെ ഭാവി ഭദ്രമെന്ന് ഏതാണ്ടുറപ്പായി.

ഇഷാൻ കിഷൻ ഒരിക്കൽ കൂടി പരാജയപ്പെട്ടപ്പോൾ സൂര്യകുമാർ യാദവ് 24 റൺസ് നേടി പുറത്തായി. രാഹുൽ ത്രിപാതിയാവട്ടെ കിട്ടിയ അവസരം മുതലാക്കി ന്യൂസിലാൻഡ് ബൗളർമാരെ കണക്കിന് പ്രഹരിച്ചു. വെറും 22 പന്തിൽ 44 റൺസ് നേടിയ ത്രിപാതിയാണ് ഇന്ത്യൻ ഇന്നിംഗ്‌സിന് തിരി കൊളുത്തിയത്.

പിന്നീട് ഗിൽ അത് ഏറ്റെടുക്കുകയായിരുന്നു. അവസാനം ഇറങ്ങിയ ഹർദിക് പാണ്ഡ്യയാവട്ടെ ക്യാപ്റ്റന്റെ പക്വതയോടെ ബാറ്റ് വീശിയപ്പോഴും സ്ട്രൈക്ക് റേറ്റ് ഇരുന്നൂറിന് അടുത്ത് തന്നെയായിരുന്നു. 17 പന്തിൽ 30 റൺസ് നേടിയ പാണ്ഡ്യ സ്കോറിലേക്ക് മോശമല്ലാത്ത സംഭാവനയാണ് നൽകിയത്. ന്യൂസിലാൻഡ് ബൗളർമാർക്ക് ഒരവസരവും നൽകാതെയാണ് ഇന്ത്യൻ താരങ്ങൾ ഇന്ന് കളിച്ചത്.

Post a Comment

Previous Post Next Post