(www.kl14onlinenews.com)
(30-Jan-2023)
സർക്കാരിനെതിരെ ധൂർത്ത് ആരോപിക്കുന്നതിനിടെ പ്രതിപക്ഷ നേതാവിന് പുതിയ കാർ: യുഡിഎഫ് പ്രതിരോധത്തിൽ
തിരുവനന്തപുരം :
പ്രതിപക്ഷ നേതാവ് വി.ഡി സതീശന് പുതിയ കാര്‍ അനുവദിച്ചത് വിവാദമാകുന്നു. സംസ്ഥാന സര്‍ക്കാരിനെതിരെ യുഡിഎഫ് നിരന്തരം ധൂര്‍ത്ത് ആരോപിക്കുന്നതിനിടെയാണ് വി.ഡി സതീശന് പുതിയ കാര്‍ അനുവദിച്ചിരിക്കുന്നത്. ധൂര്‍ത്ത് ആരോപിച്ച് സര്‍ക്കാരിനെതിരെ യുഡിഎഫ് ധവളപത്രം ഇറക്കിയ സമയത്ത് തന്നെ പ്രതിപക്ഷ നേതാവ് പുതിയ കാര്‍ ഉപയോഗിക്കുന്നുവെന്ന രീതിയിലുള്ള വിമര്‍ശനങ്ങള്‍ ഇതിനോടകം തന്നെ ഉയര്‍ന്നുകഴിഞ്ഞു.
ടൂറിസം വകുപ്പ് പുതുതായി വാങ്ങിയ പത്ത് കാറുകളില്‍ ഒന്നാണ് പ്രതിപക്ഷ നേതാവിന് നല്‍കുന്നത്. അതേസമയം, പുതിയ കാര്‍ ആവശ്യപ്പെട്ടിട്ടില്ലെന്നാണ് പ്രതിപക്ഷ നേതാവിന്റെ ഓഫീസ് നല്‍കുന്ന വിശദീകരണം. നിലവില്‍ ഉപയോഗിച്ചുകൊണ്ടിരുന്ന കാര്‍ 2.75 ലക്ഷം കിലോ മീറ്റര്‍ ഓടിയ സാഹചര്യത്തില്‍ ടൂറിസം വകുപ്പ് സ്വന്തം നിലയ്ക്ക് പുതിയ കാര്‍ നല്‍കുകയായിരുന്നുവെന്നും വി.ഡി സതീശന്റെ ഓഫീസ് വ്യക്തമാക്കി.
കഴിഞ്ഞ സര്‍ക്കാരിന്റെ കാലത്ത് പ്രതിപക്ഷ നേതാവായിരുന്നു രമേശ് ചെന്നിത്തല ഉപയോഗിച്ചിരുന്ന കാര്‍ തന്നെയാണ് വി.ഡി സതീശനും ഉപയോഗിച്ചിരുന്നത്. മൂന്ന് വര്‍ഷം പഴക്കമുള്ള വാഹനങ്ങള്‍ വിഐപി ഉപയോഗത്തിന് നല്‍കരുതെന്നാണ് ടൂറിസം വകുപ്പിന്റെ ചട്ടം. ഔദ്യോഗികമായി ആവശ്യപ്പെട്ടിട്ടില്ലെങ്കിലും ടൂറിസം വകുപ്പ് കാലാവധി കഴിഞ്ഞ വാഹനങ്ങള്‍ മാറ്റി നല്‍കാറുണ്ട്. ഇത് പ്രകാരമാണ് പ്രതിപക്ഷ നേതാവിന് പുതിയ കാര്‍ അനുവദിച്ചത്. നേരത്തെ, ഗവര്‍ണര്‍ക്കും പുതിയ കാര്‍ അനുവദിച്ചിരുന്നു.
Post a Comment