(www.kl14onlinenews.com)
(07-NOV-2022)
ലോകകപ്പിനുള്ള ബ്രസീൽ ടീമിനെ പ്രഖ്യാപിച്ചു; ഫിലിപ്പ് കുട്ടീഞ്ഞോ പുറത്ത്
റിയൊ ഡി ജനീറോ: ഖത്തര് ലോകകപ്പിനുള്ള ബ്രസീല് ടീമിനെ പ്രഖ്യാപിച്ചു. 26 അംഗ ടീമിനെയാണ് പ്രഖ്യാപിച്ചത്. നെയ്മര് അടക്കമുള്ള പ്രമുഖ താരങ്ങളെല്ലാം ടീമിലെത്തിയപ്പോള് പരിക്കേറ്റ ഫിലിപ്പെ കുടീഞ്ഞോ ടീമിലില്ല. രണ്ട് പതിറ്റാണ്ടിന് ശേഷം വീണ്ടും ലോക കിരീടമുയര്ത്തുക എന്ന ലക്ഷ്യവുമായാണ് കാനറികള് എത്തുന്നത്. ടിറ്റെയുടെ തന്ത്രങ്ങള് വിളക്കിച്ചേര്ത്ത 26 പേര്.
നെയ്മര് നേതൃത്വം നല്കുന്ന മുന്നേറ്റത്തില് ഗബ്രിയേല് ജീസസ്, വിനീഷ്യസ് ജൂനിയര്, റോഡ്രിഗോ, റഫീഞ്ഞ, ആന്റണി, ഫിര്മിനോ, റിച്ചാര്ലിസന് എന്നിവര്ക്കാണ് ഗോളടിക്കാനുള്ള ചുമതല. കാസിമിറോയ്ക്കാകും മധ്യനിരയുടെ കടിഞ്ഞാണ്. ലൂക്കാസ് പക്വേറ്റ, എവര്ട്ടന് റിബെയ്റോ, ഫ്രഡ്, ഫാബിഞ്ഞോ, എന്നിവരുള്പ്പെടുന്ന നിരയ്ക്ക് മുന്നേറ്റത്തിലേക്ക് പന്തെത്തിക്കാനും കളി ആവശ്യപ്പെടുമ്പോള് സ്കോര് ചെയ്യാനും മികവേറെ.
പ്രതിരോധ പൂട്ടിടാനും ബ്രസീലിന് താരങ്ങളുണ്ട്. പരിചയസമ്പന്നരും യുവത്വവും ഒരുമിച്ച് ചേരും കാനറിക്കരുത്തില്. തിയാഗോ സില്വയ്ക്കൊപ്പം ഡാനി ആല്വ്സിനും ഇടംകൊടുത്തു ടിറ്റെ.മാര്ക്വിഞ്ഞോസ്, അലക്സാന്ദ്രോ, അലക്സ് ടെല്ലസ്, ഡാനിലോ, എന്നിവരുടെ പ്രതിരോധപൂട്ട് കടന്നു പന്ത് വന്നാല് തടയാന് അലിസണ് ബെക്കറിനാണ് ഗോള്വലകാക്കാനുള്ള ചുമതല. എഡേഴ്സനും വെവെര്ട്ടനുമാണ് രണ്ടും മൂന്നും ഗോള്കീപ്പര്മാര്. സെര്ബിയ, സ്വിറ്റ്സര്ലന്ഡ്, കാമറൂണ് ടീമുകളെയാണ് ഗ്രൂപ്പ് ഘട്ടത്തില് ബ്രസീല് നേരിടേണ്ടത്.
ബ്രസീല് ടീം: അലിസണ് ബെക്കര്, എഡേഴ്സന്, വെവെര്ട്ടന് (ഗോള് കീപ്പര്മാര്). ഡാനിലോ, ഡാനി ആല്വസ്, അലക്സാന്ഡ്രോ, അലക്സ് ടെല്ലസ്, തിയാഗോ സില്വ, മിലിറ്റാവോ, മര്ക്വിഞ്ഞോസ് (പ്രതിരോധം). ബ്രമര്, കാസിമിറോ, ലൂക്കാസ് പക്വേറ്റ, റിബെയ്റോ, ഗ്വിമറെസ്, ഫ്രഡ്, ഫാബിഞ്ഞോ (മധ്യനിര). നെയ്മര്, ഗബ്രിയേല് ജീസസ്, വിനീഷ്യസ് ജൂനിയര്, റോഡ്രിഗോ, റഫീഞ്ഞ, ആന്റണി, ഫിര്മിനോ, റിച്ചാര്ലിസന്, മാര്ട്ടിനെല്ലി, പെഡ്രോ (മുന്നേറ്റം).
Post a Comment