(www.kl14onlinenews.com)
(24-Sep -2022)
റിസപ്ഷനിസ്റ്റിന്റെ കൊലപാതകം: പ്രതിയുടെ റിസോര്‍ട്ട് പൊളിച്ചു
ഉത്തരാഖണ്ഡില്‍ 19 കാരിയായ റിസപ്ഷനിസ്റ്റിനെ കൊലപ്പെടുത്തിയ കേസില്‍ അറസ്റ്റിലായ പ്രതിയുടെ റിസോര്‍ട്ട് പൊളിച്ചു. ബിജെപി നേതാവിന്റെ മകനായ പുല്‍കിത് ആര്യയുടെ റിസോര്‍ട്ടാണ് പൊളിച്ചുനീക്കുന്നത്. ഋഷികേശിലാണ് ഇയാളുടെ ഉടമസ്ഥതയിലുള്ള വനതാര റിസോര്‍ട്ട്. കൊലപാതകത്തില്‍ പ്രതിഷേധം ആളിക്കത്തിയതോടെ മുഖ്യമന്ത്രി പുഷ്‌കര്‍ ധാമിയാണ് റിസോര്‍ട്ട് പൊളിക്കാന്‍ ഉത്തരവിട്ടത്.
കേസില്‍ അറസ്റ്റിലായ പുല്‍കിത് ആര്യ, റിസോര്‍ട്ട് മാനേജര്‍ സൗരഭ് ഭാസ്‌കര്‍, അസിസ്റ്റന്റ് മാനേജര്‍ അങ്കിത് ഗുപ്ത എന്നിവരെ കോടതി 14 ദിവസത്തെ ജുഡീഷ്യല്‍ കസ്റ്റഡിയില്‍ വിട്ടിരുന്നു. ഹരിദ്വാറില്‍ നിന്നുള്ള ബിജെപി നേതാവ് വിനോദ് ആര്യയുടെ മകനാണ് പുല്‍കിത് ആര്യ. സെപ്റ്റംബര്‍ 18നാണ് പെണ്‍കുട്ടിയെ കാണാതായത്. പിന്നാലെ കൊല്ലപ്പെട്ടതായി സ്ഥിരീകരിക്കുകയായിരുന്നു. പ്രതികള്‍ പെണ്‍കുട്ടിയെ പീഡിപ്പിച്ചെന്നും സംഭവത്തിന്റെ ഓഡിയോ റെക്കോര്‍ഡ് ചെയ്തിട്ടുണ്ടെന്നും പെണ്‍കുട്ടിയുടെ പിതാവ് ആരോപിച്ചിട്ടുണ്ട്.
സംഭവത്തെ തുടര്‍ന്ന് സംസ്ഥാനത്തെ എല്ലാ റിസോര്‍ട്ടുകളിലും അന്വേഷണം നടത്താന്‍ ജില്ലാ മജിസ്ട്രേറ്റുകള്‍ക്ക് മുഖ്യമന്ത്രി നിര്‍ദ്ദേശം നല്‍കിയിട്ടുണ്ട്. അനധികൃതമായി പ്രവര്‍ത്തിക്കുന്ന റിസോര്‍ട്ടുകള്‍ക്കെതിരെ നടപടിയെടുക്കുമെന്ന് ഉറപ്പ് വരുത്താനും നിര്‍ദ്ദേശമുണ്ട്. കൊലപാതകം നിര്‍ഭാഗ്യകരമാണെന്നും ഇത്തരം കുറ്റകൃത്യങ്ങള്‍ക്ക് കടുത്ത ശിക്ഷ നല്‍കുമെന്ന് പുഷ്‌കര്‍ ധാമി പറഞ്ഞു.
കുറ്റവാളികള്‍ക്കിടയില്‍ ഭയം ജനിപ്പിക്കാന്‍ കെട്ടിടം ഇടിച്ചുനിരത്തണമെന്ന് ആവശ്യപ്പെട്ടിരുന്നതായി യമകേശ്വര് എംഎല്‍എ രേണു ബിഷ്ത് പറഞ്ഞു. വിഷയം ഗൗരവമായി കാണുകയും കുറ്റക്കാര്‍ക്കെതിരെ ഉടന്‍ നടപടിയെടുക്കാന്‍ ഉത്തരവിടുകയും ചെയ്ത മുഖ്യമന്ത്രിക്ക് നന്ദി. ഇരയുടെ മാതാപിതാക്കളോട് പരാതി നല്‍കിയ സമയത്ത് അപമര്യാദയായി പെരുമാറിയ റവന്യൂ പോലീസ് സബ് ഇന്‍സ്പെക്ടറെ സസ്പെന്‍ഡ് ചെയ്തതിനും നന്ദിയുണ്ടെന്ന് എംഎല്‍എ കൂട്ടിച്ചേര്‍ത്തു.
Post a Comment