കേരളത്തെ മിനി പാകിസ്ഥാനെന്ന് ആക്ഷേപിച്ച ബിജെപി മന്ത്രി നിതേഷ് റാണ സ്ഥാനത്ത് തുടരാൻ അർഹനല്ല; മുഖ്യമന്ത്രി

(www.kl14onlinenews.com)

(31-Dec-2024)

കേരളത്തെ മിനി പാകിസ്ഥാനെന്ന് ആക്ഷേപിച്ച ബിജെപി മന്ത്രി നിതേഷ് റാണ സ്ഥാനത്ത് തുടരാൻ അർഹനല്ല; മുഖ്യമന്ത്രി

തിരുവനന്തപുരം: കേരളത്തെ മിനി പാകിസ്ഥാനെന്ന് ആക്ഷേപിച്ച മഹാരാഷ്ട്രയിലെ ബിജെപി മന്ത്രിയുടെ വാക്കുകൾ അത്യന്തം പ്രകോപനപരമെന്ന് മുഖ്യമന്ത്രി പിണറായി വിജയൻ. സംഘപരിവാറിന് കേരളത്തോടുള്ള അടിസ്ഥാന സമീപനമാണ് മഹാരാഷ്ട്ര മന്ത്രിയുടെ വാക്കുകളിലുള്ളതെന്നും മുഖ്യമന്ത്രി പറഞ്ഞു. സമൂഹമാദ്ധ്യമങ്ങളിലൂടെയായിരുന്നു മുഖ്യമന്ത്രിയുടെ വിമർശനം.

‘കേരളത്തെ മിനി പാകിസ്ഥാനെന്ന് ആക്ഷേപിച്ച മഹാരാഷ്ട്രയിലെ ബിജെപി മന്ത്രി നിതേഷ് റാണയുടെ പ്രസ്താവന അത്യന്തം പ്രകോപനപരവും അപലപനീയവുമാണ്. സംഘപരിവാറിന് കേരളത്തോടുള്ള അടിസ്ഥാന സമീപനമാണ് മഹാരാഷ്ട്ര മന്ത്രിയുടെ വാക്കുകളിൽ വെളിവാക്കപ്പെടുന്നത്. തങ്ങൾക്ക് സ്വാധീനമുറപ്പിക്കാൻ പ്രയാസമുള്ള ഭൂപ്രദേശത്തെ അപരവൽക്കരിച്ചും വിദ്വേഷ പ്രചാരണങ്ങൾ നടത്തിയും ഒറ്റപ്പെടുത്തിക്കളയാമെന്നാണ് സംഘപരിവാർ കരുതുന്നത്. അതിനെ പിൻപറ്റിയാണ് ഇത്തരം പ്രസ്താവനകൾ വരുന്നത്.

വിദ്വേഷ പ്രസ്താവന നടത്തിയ മന്ത്രി ആ സ്ഥാനത്തു തുടരാൻ അർഹനല്ല. രാജ്യത്തിന്റെ ഭരണഘടനയെ അവഹേളിക്കുംവിധം ഗുരുതരമായ സത്യപ്രതിജ്ഞാലംഘനം നടത്തിയ മന്ത്രിയുടെ നടപടിയോട് രാജ്യം ഭരിക്കുന്ന പാർട്ടിയുടെ നേതൃത്വം പ്രതികരിക്കാത്തത് ആശ്ചര്യകരമാണ്.’- മുഖ്യമന്ത്രി കുറിച്ചു.

കേരളം ഒരു മിനി പാകിസ്ഥാൻ ആണെന്നും അതിനാലാണ് രാഹുൽ ഗാന്ധിയും സഹോദരി പ്രിയങ്കാ ഗാന്ധിയും തിരഞ്ഞെടുപ്പിൽ വിജയിച്ചതെന്നുമാണ് നിതേഷ് റാണ കഴിഞ്ഞ ദിവസം പറഞ്ഞത്. ഇത്തരക്കാർ എംപിമാരാകാനാണ് അവർക്ക് വോട്ട് ചെയ്യുന്നതെന്നും നിതേഷ് റാണെ വ്യക്തമാക്കിയിരുന്നു. മഹാരാഷ്ട്ര സംസ്ഥാന ഫിഷറീസ് മന്ത്രിയായ നിതേഷ് റാണ പൂനെ ജില്ലയിലെ പുരന്ദർ താലൂക്കിൽ ഒരു റാലിയെ അഭിസംബോധന ചെയ്തുകൊണ്ട് സംസാരിക്കുന്നതിനിടെയാണ് വിവാദ പരാമർശം നടത്തിയത്.