ലോകകപ്പുമായി ഇന്ത്യൻ ടീമിന്‍റെ വിക്ടറി പരേഡ് മുംബൈയില്‍

(www.kl14onlinenews.com)

(03-July-2024)

ലോകകപ്പുമായി ഇന്ത്യൻ ടീമിന്‍റെ വിക്ടറി പരേഡ് മുംബൈയില്‍

മുംബൈ: ടി20 ലോകകപ്പ് കിരീടവുമായി നാളെ രാജ്യത്തെത്തുന്ന ഇന്ത്യൻ ക്രിക്കറ്റ് ടീം രാവിലെ പ്രധാനമന്ത്രിയുമായുള്ള പ്രഭാത ഭക്ഷത്തില്‍ പങ്കെടുത്തശേഷം വൈകിട്ട് മുംബൈയില്‍ തുറന്ന ബസില്‍ വിക്ടറി പരേഡ് നടത്തും. രാവിലെ 6.20ന് ക്യാപ്റ്റന്‍ രോഹിത് ശര്‍മയുടെ നേതൃത്വത്തില്‍ ഡല്‍ഹി വിമാനത്താവളത്തിലെത്തുന്ന ബോയിംഗ് 777 വിമാനത്തില്‍ വന്നിറങ്ങുന്ന ഇന്ത്യന്‍ ടീം അംഗങ്ങള്‍ 9.30നാണ് പ്രധാനമന്ത്രി ഒരുക്കിയ സ്വീകരണത്തില്‍ പങ്കെടുക്കുക.

ഇതിനുശേഷം ചാര്‍ട്ടേര്‍ഡ് വിമാനത്തില്‍ നേരെ മുംബൈയിലേക്ക് പോകുന്ന ഇന്ത്യന്‍ ടീം അംഗങ്ങള്‍ മുംബൈ മറൈന്‍ ഡ്രൈവില്‍ നിന്ന് വാംഖഡെ സ്റ്റേ‍ഡിയം വരെ തുറന്ന ബസില്‍ കീരീടവുമായി യാത്ര ചെയ്യും. ഇന്ത്യൻ ടീമിന്‍റെ വിട്കറി മാര്‍ച്ചിലേക്ക് ക്യാപ്റ്റന്‍ രോഹിത് ശര്‍മ ആരാധകരെ ക്ഷണിച്ചിട്ടുണ്ട്. ഞങ്ങളിതാ നാട്ടിലേക്ക് വരുന്നു എന്ന അടിക്കുറിപ്പോടെ രോഹിത് കിരീടവുമായി നില്‍ക്കുന്ന ചിത്രം പങ്കുവെച്ചിരുന്നു.

വിക്ടറി മാര്‍ച്ച് എപ്പോള്‍

എവിടെ

നാളെ വൈകിട്ട് അഞ്ച് മണിക്കാണ് തുറന്ന ബസിലുള്ള ഇന്ത്യൻ ടീമിന്‍റെ വിക്ടറി മാര്‍ച്ച് തുടങ്ങുക. മുംബൈ മറൈന്‍ ഡ്രൈവില്‍ നിന്ന് വാംഖഡെ സ്റ്റേഡിയം വരെയായിരിക്കും ഇന്ത്യൻ ടീം ആരാധകരുടെ സ്നേഹാദരങ്ങള്‍ ഏറ്റുവാങ്ങി വിക്ടറി മാര്‍ച്ച് നടത്തുക. വാംഖഡെ സ്റ്റേഡിയത്തിലെത്തിയശേഷം ഇന്ത്യൻ ടീമിന് ചെറിയൊരു സ്വീകരണച്ചടങ്ങും സംഘടിപ്പിച്ചിട്ടുണ്ട്. ബിസിസിഐ സെക്രട്ടറി ജയ് ഷായും ചടങ്ങില്‍ പങ്കെടുക്കും.

വിക്ടറി മാര്‍ച്ച് കാണാനുള്ള വഴികള്‍

ലോകകപ്പുമായുള്ള ഇന്ത്യൻ ടീമിന്‍റെ വിക്ടറി മാര്‍ച്ച് നാളെ വൈകിട്ട് അഞ്ച് മണി മുതല്‍ സ്റ്റാര്‍ സ്പോര്‍ട്സിൽ തത്സമയം കാണാനാകും. വിക്ടറി മാര്‍ച്ചിനൊപ്പം രാവിലെ ഒമ്പത് മണിക്കും, 12 മണിക്കും അ‍ഞ്ച് മണിക്കും ഇന്ത്യൻ ടീമിനെക്കുറിച്ചുള്ള സ്പെഷ്യല്‍ ഷോയും സ്റ്റാര്‍ സ്പോര്‍ട്സില്‍ കാണാനാകും.