കൈവശമുള്ളത് 55,000 രൂപ, വരുമാനം ഒരു കോടി, ആകെ ആസ്തി 20 കോടി; രാഹുൽ ഗാന്ധിയുടെ ആസ്തി വിവരങ്ങൾ ഇങ്ങനെ

(www.kl14onlinenews.com)

(04-APR-2024)

കൈവശമുള്ളത് 55,000 രൂപ, വരുമാനം ഒരു കോടി, ആകെ ആസ്തി 20 കോടി; രാഹുൽ ഗാന്ധിയുടെ ആസ്തി വിവരങ്ങൾ ഇങ്ങനെ

2024ലെ ലോക്‌സഭാ തെരഞ്ഞെടുപ്പിൽ വയനാട്ടിൽ നിന്ന് മത്സരിക്കുന്ന രാഹുൽ ഗാന്ധി ബുധനാഴ്ച നാമനിർദ്ദേശപത്രിക സമർപ്പിച്ചു. തിരഞ്ഞെടുപ്പ് സത്യവാങ്മൂലത്തിൽ 55,000 രൂപ മാത്രമാണ് പണമായി കൈവശമുള്ളതെന്നും 2022-23 സാമ്പത്തിക വർഷത്തിൽ 1,02,78,680 രൂപയാണ് ആകെ വരുമാനമെന്നും രാഹുൽ ഗാന്ധി വ്യക്തമാക്കുന്നു.

ഓഹരി വിപണി നിക്ഷേപം

തൻ്റെ പേരിൽ ബാങ്കിൽ 26.25 ലക്ഷം രൂപ നിക്ഷേപമുണ്ടെന്ന് രാഹുൽ ഗാന്ധി സത്യവാങ്മൂലത്തിൽ വ്യക്തമാക്കിയിട്ടുണ്ട്. 4.33 കോടി രൂപയാണ് അദ്ദേഹത്തിൻ്റെ ഓഹരി വിപണിയിലെ ആകെ നിക്ഷേപം. മ്യൂച്വൽ ഫണ്ടുകളിൽ 3.81 കോടി രൂപയുടെ നിക്ഷേപവുമുണ്ട്. അതേസമയം സോവറിൻ ഗോൾഡ് ബോണ്ടിലെ നിക്ഷേപം 15.2 ലക്ഷം രൂപയാണ്. ഇവയ്ക്ക് പുറമെ 4.2 ലക്ഷം രൂപയുടെ ആഭരണങ്ങളുണ്ടെന്നും വ്യക്തമാക്കുന്നു.

ഇത് കൂടാതെ രാഹുൽ ഗാന്ധിയുടെ പേരിൽ എൻഎസ്എസ്, തപാൽ സേവിംഗ്, ഇൻഷുറൻസ് പോളിസികളിലായി ഏകദേശം 61.52 ലക്ഷം രൂപയുടെ നിക്ഷേപമുണ്ട്.

9,24,59,264 രൂപ വിലമതിക്കുന്ന സ്വത്തുക്കളാണ് രാഹുൽ ഗാന്ധിക്കുള്ളത്. ഇത്തരത്തിൽ അദ്ദേഹത്തിൻ്റെ ആകെ ആസ്തി 20,38,61,862 രൂപയാണ്. ഇവയ്ക്കൊപ്പംതന്നെ അദ്ദേഹത്തിന് ഏകദേശം 49,79,184 രൂപയുടെ ബാധ്യതയുണ്ട്. 2004-ലാണ് രാഹുൽ ഗാന്ധി തൻ്റെ ആദ്യ തിരഞ്ഞെടുപ്പിൽ മത്സരിക്കുന്നത്. അക്കാലത്ത് അദ്ദേഹത്തിൻ്റെ ആകെ ആസ്തി 55 ലക്ഷം രൂപയായിരുന്നു.

വയനാട്ടിൽ രണ്ടാം തവണയാണ് അദ്ദേഹം തെരഞ്ഞെടുപ്പിൽ മത്സരിക്കുന്നത് എന്നത് ശ്രദ്ധേയമാണ്. 2019ൽ അദ്ദേഹം ഇവിടെ വലിയ ഭൂരിപക്ഷത്തിൽ വിജയിച്ചിരുന്നു