വെടിവയ്പ്പ് സംഭവത്തിന് ശേഷം മുംബൈ ബാന്ദ്രയിലെ വീട്ടിലെത്തി സൽമാൻ ഖാനെ കണ്ട് മുഖ്യമന്ത്രി ഏകനാഥ് ഷിൻഡെ

(www.kl14onlinenews.com)

(16-APR-2024)

വെടിവയ്പ്പ് സംഭവത്തിന് ശേഷം മുംബൈ ബാന്ദ്രയിലെ വീട്ടിലെത്തി സൽമാൻ ഖാനെ കണ്ട് മുഖ്യമന്ത്രി ഏകനാഥ് ഷിൻഡെ

മുംബൈ :

ബോളിവുഡ് സൂപ്പർ താരം സൽമാൻ ഖാൻ്റെ മുംബൈ ബാന്ദ്രയിലെ വസതിക്ക് പുറത്ത് രണ്ട് പേർ വെടിയുതിർത്ത സംഭവത്തിന് ശേഷം മഹാരാഷ്ട്ര മുഖ്യമന്ത്രി ഏകനാഥ് ഷിൻഡെ ചൊവ്വാഴ്ച സൽമാൻ ഖാൻ്റെ വസതി സന്ദർശിച്ചു. ഗ്യാലക്‌സി അപ്പാർട്ട്‌മെൻ്റിലെ വീട്ടിൽ സൽമാൻ ഖാനെയും പിതാവ് സലിം ഖാനെയും ഷിൻഡെ കാണുകയും കുടുംബത്തിൻ്റെ സുരക്ഷ ഉറപ്പാക്കുകയും ചെയ്തു.

സൽമാൻ ഖാനും കുടുംബത്തിനും നൽകുന്ന സുരക്ഷ സർക്കാർ ശക്തമാക്കുമെന്നും ഷിൻഡെ പറഞ്ഞു. സംസ്ഥാനത്ത് അധോലോക സംഘത്തിൻ്റെ പ്രവർത്തനങ്ങൾ വെച്ചു പൊറുപ്പിക്കില്ലെന്നും അദ്ദേഹം പറഞ്ഞു.

ഞായറാഴ്ച രാവിലെയാണ് ബാന്ദ്രയിലെ സൽമാൻ ഖാൻ്റെ വീടിന് പുറത്ത് വെടിവെപ്പുണ്ടായത്. സംഭവത്തിൽ രണ്ട് പേരെ മുംബൈ പോലീസ് അറസ്റ്റ് ചെയ്ത് മണിക്കൂറുകൾക്ക് ശേഷമാണ് ഷിൻഡെ സൽമാൻ ഖാനെ കണ്ടത്. ഗുജറാത്തിലെ കച്ച് ജില്ലയിലെ ഒരു ഗ്രാമത്തിൽ നിന്നാണ് പ്രതികളായ വിക്കി ഗുപ്ത (24), സാഗർ പാൽ (21) എന്നിവരെ അറസ്റ്റ് ചെയ്തത്.

ബിഹാറിലെ വെസ്റ്റ് ചമ്പാരൻ സ്വദേശികളായ ഇരുവരും കുറ്റം സമ്മതിച്ചിട്ടുണ്ട്. സൽമാൻ്റെ വീടിന് നേരെ വെടിയുതിർക്കാൻ തടവിലാക്കപ്പെട്ട ഗുണ്ടാസംഘം ലോറൻസ് ബിഷ്‌ണോയിയുടെ സംഘമാണ് സാഗറിനെയും വിക്കിയെയും വാടകയ്‌ക്കെടുത്തതെന്ന് പ്രാഥമിക അന്വേഷണത്തിന് ശേഷം മുംബൈ പോലീസ് വെളിപ്പെടുത്തി.

മുംബൈ പോലീസിൻ്റെ ക്രൈംബ്രാഞ്ചാണ് കേസ് അന്വേഷിക്കുന്നത്, അറസ്റ്റിലായ രണ്ട് പ്രതികൾ സൽമാൻ ഖാൻ്റെ വീടിന് പുറത്ത് "കൊലപ്പെടുത്താനുള്ള ശ്രമത്തിലാണ് വെടിയുതിർത്തതെന്ന് അവകാശപ്പെട്ടു.

മുംബൈയിലെ മജിസ്‌ട്രേറ്റ് കോടതിയിൽ ഹാജരാക്കിയ ഇരുവരെയും ഏപ്രിൽ 25 വരെ പോലീസ് കസ്റ്റഡിയിൽ വിട്ടു.

പ്രതികൾക്കെതിരെ ഇന്ത്യൻ ശിക്ഷാനിയമം 307 (കൊലപാതകശ്രമം), 120-ബി (ക്രിമിനൽ ഗൂഢാലോചന), 34, ആയുധ നിയമത്തിലെ പ്രസക്തമായ വകുപ്പുകൾ എന്നിവ പ്രകാരമാണ് കേസെടുത്തിരിക്കുന്നത്