ഹാര്‍ദിക്കിന്റെ മുംബൈക്ക് മൂന്നാം തോൽവി; പരാഗിന്റെ കരുത്തില്‍ രാജസ്ഥാന് ജയം

(www.kl14onlinenews.com)

(01-APR-2024)

ഹാര്‍ദിക്കിന്റെ മുംബൈക്ക് മൂന്നാം തോൽവി; പരാഗിന്റെ കരുത്തില്‍ രാജസ്ഥാന് ജയം

മുംബൈ :

ഐപിഎല്ലിൽ (IPL 2024) രാജസ്ഥാൻ റോയൽസിന് (Rajasthan Royals) തുടർച്ചയായ മൂന്നാം ജയം. മുംബൈ ഇന്ത്യൻസിനെതിരായ (Mumbai Indians) മത്സരത്തിൽ 6 വിക്കറ്റിനാണ് സഞ്ജുവും ടീമും വിജയിച്ചത്. മുംബൈ ഉയർത്തിയ 126 റൺസ്‌ എന്ന ചെറിയ സ്കോർ പിന്തുടർന്ന രാജസ്ഥാൻ 27 പന്തുകൾ ബാക്കി നിർത്തിയാണ് മത്സരം കൈപ്പിടിയിലാക്കിയത്. റിയാൻ പരാഗിന്റെ അർദ്ധ സെഞ്ച്വറി പ്രകടനമാണ് രാജസ്ഥന്റെ ജയത്തിൽ നിർണായകമായത്.

ടോസ് നഷ്ടപ്പെട്ട് ആദ്യം ബാറ്റ് ചെയ്ത മുംബൈ ഇന്ത്യൻസിന്റെ തുടക്കം തകർച്ചയോടെയായിരുന്നു. ട്രെൻഡ് ബോൾട്ട് എറിഞ്ഞ ആദ്യ ഓവറിൽ തന്നെ മുംബൈ ഇന്ത്യൻസിന് രണ്ട് വിക്കറ്റുകൾ നഷ്ടമായിരുന്നു. രോഹിത് ശർമ്മയും നമാൻ ധിറും നേരിട്ട ആദ്യ പന്തുകളിൽ തന്നെ പുറത്തായി. 20 റൺസ് നേടുന്നതിനിടെ മുംബൈയുടെ നാല് മുൻനിര ബാറ്റ്സ്മാൻമാർ കൂടാരം കയറി. ഇംപാക്ട് പ്ലെയറായി കളത്തിലിറങ്ങിയ ഡെവാൾഡ് ബ്രെവിസിനും അക്കൗണ്ട് തുറക്കാനായില്ല.

തിലക് വർമ്മയും നായകൻ ഹർദിക് പാണ്ഡ്യയും ഉത്തരവാദിത്തത്തോടെ ബാറ്റ് വീശിയപ്പോൾ മുംബൈ മത്സരത്തിലേക്ക് തിരികെ വരുമെന്ന പ്രതീതിയുണ്ടായി. തിലക് വർമ്മ 32ഉം ഹർദിക് പാണ്ഡ്യ 34ഉം റൺസെടുത്ത് മടങ്ങിയതോടെ മുംബൈയുടെ തകർച്ച പൂർത്തിയായി. രാജസ്ഥാന് വേണ്ടി യുസ്‌വേന്ദ്ര ചഹലും ട്രെൻഡ് ബോൾട്ടും മൂന്ന് വിക്കറ്റുകൾ വീതം വീഴ്ത്തി. ബർഗർ രണ്ട് വിക്കറ്റുകൾ വീഴ്ത്തിയപ്പോൾ ആവേശ് ഖാൻ ഒരു വിക്കറ്റ് സ്വന്തമാക്കി.

മറുപടി ബാറ്റിംഗിൽ രാജസ്ഥാന്റെ തുടക്കവും തകർച്ചയോടെ ആയിരുന്നു. അപകടകാരികളായ യശസ്വി ജയ്‌സ്വാൾ (10), ജോസ് ബട്ലർ (13), നായകൻ സഞ്ജു സാംസൺ (12) എന്നിവർക്ക് നിലയുറപ്പിക്കാനായില്ല. കഴിഞ്ഞ മത്സരത്തിലെ ഹീറോ ആയിരുന്ന റിയാൻ പരാഗ് വീണ്ടും രാജസ്ഥാന്റെ രക്ഷകനാകുന്ന കാഴ്ചയാണ് പിന്നീട് കാണാനായത്. പതിയെ തുടങ്ങിയ പരാഗ് കൃത്യമായ ഇടവേളയിൽ ആഞ്ഞടിക്കാൻ തുടങ്ങിയതോടെ മത്സരം രാജസ്ഥാന് അനുകൂലമായി. 39 പന്തുകൾ നേരിട്ട പരാഗ് അഞ്ച് ബൗണ്ടറികളുടേയും മൂന്ന് സിക്സറുകളുടേയും അകമ്പടിയോടെ പുറത്താകാതെ 54 റൺസ് നേടി. രവിചന്ദ്രൻ അശ്വിൻ 16 റൺസ് നേടി പരാഗിന് മികച്ച പിന്തുണ നൽകി. ശുഭം ദുബെ എട്ട് റൺസുമായി പുറത്താകാതെ നിന്നു. മുംബൈയ്ക്ക് വേണ്ടി ആകാശ് മധ്വാൾ നാല് ഓവറിൽ 20 റൺസ് വഴങ്ങി മൂന്ന് വിക്കറ്റുകൾ വീഴ്തി.

തുടർച്ചയായ മൂന്നാം മത്സരവും വിജയിച്ച രാജസ്ഥാൻ പോയിന്റ് പട്ടികയിൽ ഒന്നാം സ്ഥാനത്തെത്തി. കളിച്ച മൂന്ന് മത്സരങ്ങളിലും പരാജയപ്പെട്ട മുംബൈ ഇന്ത്യൻസ് അവസാന സ്ഥാനത്തേക്ക് വീണു.