(www.kl14onlinenews.com)
(13-APR-2024)
രാഹുല്‍ ഗാന്ധിയുടെ പ്രചാരണത്തിന് ഒരു പതാകയും ഉപയോഗിക്കില്ല, ചിഹ്നം മാത്രം; എം എം ഹസ്സന്‍
വയനാട്ടില്‍ രാഹുല്‍ഗാന്ധിയുടെ പ്രചാരണത്തിന് ഒരു പതാകയും ഉപയോഗിക്കില്ലെന്ന് കെപിസിസി ആക്ടിങ് പ്രസിഡന്‍റ് എം.എം.ഹസന്‍. ചിഹ്നം മാത്രമാണ് ഉപയോഗിക്കുന്നത്. ആ തീരുമാനത്തിലേക്ക് എത്തിയതിന്‍റെ സാഹചര്യം മാധ്യമങ്ങളോട് വിശദീകരിക്കാനാകില്ല. മറ്റുമണ്ഡലങ്ങളില്‍ സ്ഥാനാര്‍ഥികള്‍ക്ക് താല്‍പര്യം ഉണ്ടെങ്കില്‍ പതാകകള്‍ ഉപയോഗിക്കാമെന്നും എം.എം.ഹസന്‍ പത്തനംതിട്ടയിലെ വാര്‍ത്താ സമ്മേളനത്തില്‍ പറ‍ഞ്ഞു.
അതേസമയം
നാല് വോട്ടിന് വേണ്ടിയാണ് പത്തനംതിട്ടയിലെ ബിജെപി സ്ഥാനാര്‍ത്ഥി കൂടിയായ അനില്‍ ആന്റണി പിതാവ് എ കെ ആന്റണിയെ തള്ളിപ്പറഞ്ഞതെന്നും എം എം ഹസ്സന്‍ വിമര്‍ശിച്ചു. ആന്റണിയുടെ രക്തത്തില്‍ ജനിച്ച മകനാണ് ആന്റണിയെ കാലഹരണപ്പെട്ട നേതാവെന്ന് പറഞ്ഞത്. എക്‌സ്പയറി ഡെയിറ്റ് കഴിഞ്ഞാല്‍ മരുന്ന് കളയുന്നത് പോലെയാണ് അനില്‍ ആന്റണിയുടെ സ്വഭാവം. മുപ്പത് വെള്ളിക്കാശിന് ക്രിസ്തുവിനെ ഒറ്റിക്കൊടുത്ത യൂദാസിനേപ്പോലെയാണ് അനില്‍ ആന്റണി. ശബരിമല ശാസ്താവിന്റെ കര്‍മ്മഭൂമിയില്‍ വച്ചാണ് അനില്‍ ആന്റണി പരാമര്‍ശം നടത്തിയത്. എത്ര വോട്ട് കിട്ടിയാലും അനില്‍ ആന്റണി പത്തനംതിട്ടയില്‍ ജയിക്കാന്‍ പോകുന്നില്ല. അനില്‍ ആന്റണി പത്തനംതിട്ടയില്‍ ജയിക്കണമെങ്കില്‍ കാക്ക മലന്ന് പറക്കണം. കെട്ടി വച്ച പണം പോലും അനില്‍ ആന്റണിക്ക് കിട്ടില്ലെന്നും എം എം ഹസ്സന്‍ വിമർശിച്ചു.
വയനാട്ടില്‍ കെ സുരേന്ദ്രന്‍ ജയിക്കില്ല. അതിനാല്‍ സുല്‍ത്താന്‍ ബത്തേരിയുടെ പേര് മാറ്റാനും പോകുന്നില്ല. ഇവിഎമ്മില്‍ കൃത്രിമം കാണിച്ചാലും ബിജെപി ജയിക്കാന്‍ പോകുന്നില്ല. ഇവിഎമ്മിലല്ല ജനങ്ങളിലാണ് കോണ്‍ഗ്രസിന് വിശ്വാസമെന്നും എം എം ഹസ്സന്‍ കൂട്ടിച്ചേര്‍ത്തു.
ഏപ്രില്‍ 15, 16 തീയതികളില്‍ റോഡ്ഷോ
കല്‍പ്പറ്റ: തിരഞ്ഞെടുപ്പ് പ്രചാരണത്തിനായി രാഹുല്‍ ഗാന്ധി വീണ്ടും വയനാട്ടിലെത്തും. ഈ മാസം 15, 16 തീയതികളിലാണ് രാഹുല്‍ മണ്ഡല പര്യടനം നടത്തുക. കോഴിക്കോടും റോഡ് ഷോ തീരുമാനിച്ചിട്ടുണ്ട്.
15ന് രാവിലെ കണ്ണൂര്‍ വിമാനത്താവളത്തിലെത്തുന്ന രാഹുല്‍ ഗാന്ധി അന്ന് സുല്‍ത്താന്‍ ബത്തേരി, മാനന്തവാടി, കല്‍പ്പറ്റ നിയോജകമണ്ഡലങ്ങളില്‍ പര്യടനം നടത്തും. കോഴിക്കോട് കടപ്പുറത്ത് നടക്കുന്ന യുഡിഎഫ് റാലിയിലും പൊതുസമ്മേളനത്തിലും രാഹുല്‍ ഗാന്ധി പങ്കെടുക്കും.
إرسال تعليق