കോവിഡ് വ്യാപനം: കർണാടകയിൽ മാസ്ക് നിർബന്ധമാക്കി

(www.kl14onlinenews.com)

(18-DEC-2023)

കോവിഡ് വ്യാപനം: കർണാടകയിൽ മാസ്ക് നിർബന്ധമാക്കി

ബാംഗ്ലൂർ :

കേരളത്തിലും മറ്റ് സംസ്ഥാനങ്ങളിലും കോവിഡ്-19 കേസുകൾ (Covid-19 cases) വർധിക്കുന്ന സാഹചര്യത്തിൽ കർണാടകയിൽ (Karnataka) മാസ്ക് നിർബന്ധമാക്കുന്നു (Mask). മുതിർന്ന പൗരന്മാരും രോഗങ്ങളുള്ളവരും മാസ്ക് ധരിക്കണമെന്നാണ് കർണാടക ആരോഗ്യ-കുടുംബക്ഷേമ മന്ത്രി ദിനേശ് ഗുണ്ടു റാവു (Dinesh Gundu Rao) പറഞ്ഞു. കേരളത്തിലും മറ്റ് സംസ്ഥാനങ്ങളിലും കോവിഡ്-19 കേസുകൾ വർധിച്ചതിന് പിന്നാലെയാണ് അദ്ദേഹത്തിന്റെ മുന്നറിയിപ്പ്. ആശങ്കപ്പെടേണ്ട സാഹചര്യമില്ലെന്നും കർണാടകയിലെ കുടകിൽ മാധ്യമപ്രവർത്തകരോട് സംസാരിക്കവെ ആരോഗ്യമന്ത്രി പറഞ്ഞു. “ഞങ്ങൾ ഇന്നലെ ഒരു യോഗം ചേർന്നു, അവിടെ എന്ത് നടപടികൾ സ്വീകരിക്കണമെന്ന് ചർച്ച ചെയ്തു. ഉടൻ മാർ​ഗനിർദേശം നൽകും. 60 വയസ്സിനു മുകളിൽ പ്രായമുള്ളവരും ഹൃദയസംബന്ധമായ പ്രശ്‌നങ്ങളുള്ളവരും രോഗാവസ്ഥയുള്ളവരും നിർബന്ധമായും മാസ്‌ക് ധരിക്കണം“ അദ്ദേഹം പറഞ്ഞു.

“സർക്കാർ ആശുപത്രികളോട് തയ്യാറെടുക്കാൻ ഞങ്ങൾ ആവശ്യപ്പെട്ടിട്ടുണ്ട്. കേരളവുമായി അതിർത്തി പങ്കിടുന്ന പ്രദേശങ്ങൾ കൂടുതൽ ജാഗ്രത പാലിക്കണം. മംഗലാപുരം, ചമനാജ് നഗർ, കുടക് എന്നിവിടങ്ങളിൽ ജാഗ്രത പാലിക്കണം. പരിശോധന വർദ്ധിപ്പിക്കും. ശ്വാസകോശ സംബന്ധമായ പ്രശ്‌നങ്ങളുള്ളവർ നിർബന്ധമായും പരിശോധനയ്ക്ക് വിധേയരാകേണ്ടിവരുമെന്നും“ അദ്ദേഹം കൂട്ടിച്ചേർത്തു.

അതേസമയം കേന്ദ്ര ആരോഗ്യ മന്ത്രാലയത്തിന്റെ കണക്കുകൾ പ്രകാരം, രാജ്യത്ത് സജീവ കോവിഡ് കേസുകളുടെ എണ്ണം 1,828 ആയി ഉയർന്നു. അതിനിടെ കേരളത്തിൽ ഒരു മരണം രേഖപ്പെടുത്തി. കോവിഡ് കേസുകൾ ഉയരുന്ന സാഹചര്യത്തിൽ രാജ്യങ്ങൾക്ക് മുന്നറിയിപ്പുമായി ലോകാരോഗ്യ സംഘടന(ഡബ്യുഎച്ചഒ) രം​ഗത്തെത്തി. കോവിഡ് കേസുകളിൽ ശക്തമായ നിരീക്ഷണം നിലനിർത്താനും കണക്കുകൾ പങ്കിടുന്നത് തുടരാനും ലോകാരോഗ്യ സംഘടന രാജ്യങ്ങളോട് ആവശ്യപ്പെട്ടു. ബിഎ.2.86ന്റെ ഉപവിഭാഗമായ ജെഎൻ.1 (JN.1) എന്നറിയപ്പെടുന്ന പുതിയ വകഭേദത്തിന്റെ വ്യാപനം മൂലം വിവിധ രാജ്യങ്ങളിൽ കോവിഡ് കേസുകൾ കുത്തനെ ഉയരുന്ന സാഹചര്യമാണ് നിലവിൽ. ഇതിന് പിന്നാലെയാണ് മുന്നറിയിപ്പുമായി ലോകാരോ​ഗ്യ സംഘടന രം​ഗത്തെത്തിയത്.

അതേസമയം രാജ്യത്ത് അഞ്ച് കോവിഡ് മരണങ്ങൾ റിപ്പോർട്ട് ചെയ്തതായി അധികൃതർ അറിയിച്ചു. 335 പുതിയ കേസുകളും റിപ്പോർട്ട് ചെയ്തിട്ടുണ്ട്. സജീവ കേസുകളുടെ എണ്ണം 1,700-ലധികമാണ്. അഞ്ച് മരണങ്ങൾ റിപ്പോർട്ട് ചെയ്തതിൽ നാലെണ്ണവും കേരളത്തിലാണ്. ‌മറ്റൊന്ന് ഉത്തർപ്രദേശിലാണ്. രാജ്യത്തെ മൊത്തം കോവിഡ് കേസുകളുടെ എണ്ണം 4.50 കോടിയാണ് (4,50,04,816). രോഗമുക്തി നേടിയവരുടെ എണ്ണം 4.46 കോടിയായി (4,44,69,799) ഉയർന്നു. ദേശീയ രോഗമുക്തി നിരക്ക് 98.81 ശതമാനമാണെന്ന് ആരോഗ്യ മന്ത്രാലയം അറിയിച്ചു. ഇതുവരെ, 5,33,316 പേർക്കാണ് കോവിഡ് -19 മൂലം ജീവൻ നഷ്ടമായത്. കേസിലെ മരണനിരക്ക് 1.19 ശതമാനമാണ്. മന്ത്രാലയത്തിന്റെ കണക്കുകൾ അനുസരിച്ച്, രാജ്യത്ത് ഇതുവരെ 220.67 കോടി ഡോസ് കോവിഡ് വാക്‌സിൻ നൽകിയിട്ടുണ്ട്.