(www.kl14onlinenews.com)
(30-Oct-2023)
ഇന്ത്യയിലേക്ക് മടങ്ങാനൊരുങ്ങി അഞ്ജു: മക്കളെ കണ്ടശേഷം തിരികെ പാകിസ്ഥാനിലേക്ക്
ഫേസ്ബുക്കിലൂടെ പരിചയപ്പെട്ട സുഹൃത്തിനെ വിവാഹം കഴിക്കാന്‍ പാകിസ്ഥാനിലേക്ക് പോയ രാജസ്ഥാന്‍ സ്വദേശി അഞ്ജു ഉടന്‍ ഇന്ത്യയിലേക്ക് മടങ്ങും. പാകിസ്ഥാന്‍ സര്‍ക്കാരില്‍ നിന്ന് അനുമതി ലഭിച്ച ശേഷം ഇന്ത്യയിലേക്ക് മടങ്ങുമെന്ന് അഞ്ജുവിന്റെ ഭര്‍ത്താവ് നസ്‌റുല്ല പറഞ്ഞു. അഞ്ജുവിന്റെ വിസ ഓഗസ്റ്റില്‍ പാകിസ്ഥാന്‍ ഒരു വര്‍ഷത്തേക്ക് കൂടി നീട്ടിയിരുന്നു.
'ഇസ്ലാമാബാദിലെ ആഭ്യന്തര മന്ത്രാലയത്തില്‍ നിന്നുള്ള എന്‍ഒസിക്കായി (നോ-ഒബ്ജക്ഷന്‍ സര്‍ട്ടിഫിക്കറ്റ്) ഞങ്ങള്‍ കാത്തിരിക്കുകയാണ്. എന്‍ഒസി നടപടികള്‍ അല്‍പ്പം ദൈര്‍ഘ്യമേറിയതാണ്, അത് പൂര്‍ത്തിയാക്കാന്‍ സമയമെടുക്കും,'' നസ്‌റുല്ല പിടിഐയോട് പറഞ്ഞു.
വാഗാ ബോര്‍ഡര്‍ പോയിന്റില്‍ നിന്ന് പോകാനുള്ള രേഖകള്‍ പൂര്‍ത്തിയായാലുടന്‍ അഞ്ജു ഇന്ത്യയിലേക്ക് പോകുമെന്നും അദ്ദേഹം പറഞ്ഞു. ഇന്ത്യയിലെത്തി മക്കളെ കണ്ടതിന് ശേഷം അവര്‍ പാകിസ്ഥാനിലേക്ക് മടങ്ങും, നസ്‌റുല്ല പറഞ്ഞു. ഇപ്പോള്‍ അവരുടെ വീട് പാകിസ്ഥാനിലാണ് അതിനാല്‍ തീര്‍ച്ചയായും മടങ്ങിവരുമെന്നും അദ്ദേഹം കൂട്ടിച്ചേര്‍ത്തു.
രാജസ്ഥാന്‍ സ്വദേശിയായ അഞ്ജുവിന് 15 വയസ്സുള്ള ഒരു മകളും ആറ് വയസ്സുള്ള ഒരു മകനുമുണ്ട്. 2019 മുതല്‍ ഫേസ്ബുക്ക് സുഹൃത്തുക്കളാണ് അഞ്ജുവും പാകിസ്ഥാന്‍ സ്വദേശിയായ നസ്‌റുല്ലയും. കഴിഞ്ഞ ജൂലൈ 25നാണ് ഇവരുടെ വിവാഹം കഴിഞ്ഞത്. നസ്റുല്ലയെ വിവാഹം കഴിക്കുന്നതിനായി ഇസ്ലാം മതം സ്വീകരിച്ച അഞ്ജു പിന്നീട് ഫാത്തിമയായി.
إرسال تعليق