(www.kl14onlinenews.com)
(24-Aug-2023)
കെ കെ ശൈലജയുടെ ആത്മകഥ കണ്ണൂര്‍ സര്‍വകലാശാല സിലബസില്‍; വിമര്‍ശനം
മുന്‍ ആരോഗ്യമന്ത്രി കെകെ ശൈലജയുടെ ആത്മകഥ കണ്ണൂര്‍ സര്‍വകലാശാല സിലബസില്‍ ഉള്‍പ്പെടുത്തിയെന്ന് ആരോപണം. വാട്ട്‌സ്ആപ്പ് ഗ്രൂപ്പുകളിലൂടെ പ്രചരിക്കുന്ന എംഎ ഇംഗ്ലീഷ് സിലബസിലാണ് കെകെ ഷൈലജയുടെ ആത്മകഥയായ 'മൈ ലൈഫ് ആസ് എ കോമ്രേഡ്' എന്നതും പാഠഭാഗമാക്കി ഉള്‍പ്പെടുത്തിയിരിക്കുന്നത്.
പിജി വിദ്യാര്‍ത്ഥികളുടെ ഒന്നാം സെമസ്റ്ററില്‍ ലൈഫ് റൈറ്റിങ് എന്ന വിഭാഗത്തിലാണ് ശൈലജയുടെ ആത്മകഥയുടെ ഒരു ഭാഗം ഉള്‍പ്പെടുത്തിയത്. വ്യത്യസ്ത വിഭാഗങ്ങളില്‍ നിന്നുള്ള വ്യക്തികളുടെ ജീവിതത്തെ കുറിച്ചുള്ള എഴുത്തുകള്‍ പരിചയപ്പെടുത്താനുള്ള ഈ പാഠഭാഗം വിദ്യാര്‍ത്ഥികള്‍ നിര്‍ബന്ധമായും പഠിക്കേണ്ട ഒന്നല്ല. ഇതില്‍ വിദ്യാര്‍ത്ഥികള്‍ക്ക് തിരഞ്ഞെടുപ്പ് സ്വാതന്ത്ര്യമുണ്ട്. എന്നാല്‍ ശൈലജയുടെ ആത്മകഥാംശം ഉള്‍പ്പെടുത്തിയത് സിലബസിനെ രാഷ്ട്രീയവത്കരിക്കാനുള്ള ശ്രമമാണെന്നാണ് കോണ്‍ഗ്രസ് അനുകൂല അധ്യാപക സംഘടനയുടെ വിമര്‍ശനം.
സര്‍വ്വകലാശാലയില്‍ ബോര്‍ഡ് ഓഫ് സ്റ്റഡീസ് ഇല്ലാത്തതിനാല്‍ അഡ്ഹോക് കമ്മിറ്റികളാണ് സിലബസ് തയ്യാറാക്കിയത്. ഒന്‍പത് വര്‍ഷത്തിന് ശേഷമാണ് സിലബസ് പരിഷ്‌കരണം നടക്കുന്നത്. പി ജി ക്ലാസുകള്‍ ആരംഭിച്ച ശേഷമാണ് സിലബസ് പുറത്തുവരുന്നത്. ഓഗസ്റ്റ് 8-നാണ് പി ജി ക്ലാസുകള്‍ ആരംഭിച്ചത്. വിഷയം വിവാദമായ പശ്ചാത്തലത്തില്‍ വിശദീകരണവുമായി അഡ്ഹോക് കമ്മിറ്റി രംഗത്തുവന്നു. ആത്മകഥ നിര്‍ബന്ധിത പഠന വിഷയമല്ലെന്നാണ് പ്രതികരണം. അറിയപ്പെടുന്നതും അറിയപ്പെടാത്തതുമായ പ്രാദേശിക വ്യക്തിത്വങ്ങളെ പരിചയപ്പെടുത്തുകയാണ് ലക്ഷ്യമിട്ടതെന്നും അഡ്ഹോക് കമ്മിറ്റി പ്രതികരിച്ചു. കഴിഞ്ഞ ഏപ്രിലില്‍ ഡല്‍ഹി കേരള ഹൗസില്‍വെച്ച് മുഖ്യമന്ത്രി പിണറായി വിജയനാണ് ശൈലജയുടെ ആത്മകഥ പ്രകാശനം ചെയ്തത്.
Post a Comment