(www.kl14onlinenews.com)
(July -02-2023)
ജയില്‍ ഉദ്യോഗസ്ഥന് മര്‍ദ്ദനം: ആകാശ് തില്ലങ്കേരി അറസ്റ്റില്‍, പൊലീസ് നീക്കം കോടതി അനുമതിക്ക് പിന്നാലെ
വിയ്യൂര്‍ സെന്‍ട്രല്‍ ജയിലില്‍ വെച്ച് അസിസ്റ്റന്റ് ജയിലറെ മര്‍ദിച്ച സംഭവത്തില്‍ ആകാശ് തില്ലങ്കേരി അറസ്റ്റില്‍. കോടതിയുടെ അനുമതിയെ തുടര്‍ന്ന് പൊലീസ് ജയിലിലെത്തി അറസ്റ്റ് രേഖപ്പെടുത്തി. സംഭവത്തില്‍ ആകാശിനെതിരെ വിയ്യൂര്‍ പോലീസ് ജാമ്യമില്ലാക്കുറ്റം ചുമത്തിയാണ് കേസെടുത്തിരിക്കുന്നത്. കാപ്പ തടവുകാരനാണ് ശുഹൈബ് വധക്കേസ് പ്രതിയായ ആകാശ് തില്ലങ്കേരി.
ഫോണുപയോഗിച്ചെന്ന സംശയത്തെ തുടര്‍ന്ന് ആകാശിനെ അസി.ജയിലര്‍ രാഹുല്‍ ചോദ്യം ചെയ്തിരുന്നു. സെല്ലിന്റെ ഒരു ഭാഗം തുണികൊണ്ട് മറച്ചത് കണ്ടപ്പോഴാണ് സംശയം തോന്നിയത്. ഇത് എന്തിനാണെന്ന് ചോദിച്ചപ്പോഴായിരുന്നു മര്‍ദ്ദനം. സംഭവത്തില്‍ പരിക്കേറ്റ രാഹുല്‍ തൃശൂര്‍ മെഡിക്കല്‍ കോളജ് ആശുപത്രിയില്‍ ചികിത്സ തേടിയിരുന്നു. പിന്നാലെ തില്ലങ്കരിക്കെതിരെ വിയ്യൂര്‍ പോലീസില്‍ പരാതി നല്‍കുകയും ചെയ്തു.
എന്നാല്‍ ജയില്‍ ഉദ്യോഗസ്ഥര്‍ തന്നെ ആക്രമിക്കുകയായിരുന്നുവെന്നാണ് ആകാശ് തില്ലങ്കേരിയുടെ വാദം. സംഭവത്തിന് പിന്നാലെ വിയ്യൂരിലെ അതീവ സുരക്ഷാ ജയിലിലെ പ്രത്യേക സെല്ലിലേക്ക് ആകാശിനെ മാറ്റിയിരുന്നു. ഇതിനിടെ അസി ജയിലറുടെ മൊഴി രേഖപ്പെടുത്തിയ പൊലീസ് അറസ്റ്റ് നടപടികള്‍ക്കായി കോടതിയെ സമീപിക്കുകയായിരുന്നു. ഇതു സംബന്ധിച്ച അപേക്ഷ തൃശൂര്‍ മജിസ്‌ട്രേറ്റ് കോടതി അംഗീകരിച്ചതോടെ അറസ്റ്റിലേക്ക് വഴിയൊരുങ്ങി..
Post a Comment