(www.kl14onlinenews.com)
(27-Aug -2022)
നെഹ്റു ട്രോഫി വള്ളംകളി മുഖ്യാതിഥിയായി അമിത് ഷാ; വിശദീകരണവുമായി സർക്കാർ
തിരുവനന്തപുരം: നെഹ്റു ട്രോഫി വള്ളംകളിയുടെ മുഖ്യാതിഥിയായി ആഭ്യന്തരമന്ത്രി അമിത് ഷായെ ക്ഷണിച്ചതില്‍ വിശദീകരണവുമായി സര്‍ക്കാര്‍.
സെപ്തംബര്‍ മൂന്നിനു തിരുവനന്തപുരത്ത് നടക്കുന്ന 30-ാമത് സതേണ്‍ സോണല്‍ കൗണ്‍സില്‍ യോഗത്തില്‍ പങ്കെടുക്കാനാണ് അമിത് ഷാ എത്തുന്നത്. കേരളത്തിനാണ് ഈ യോഗത്തിന്റെ അധ്യക്ഷസ്ഥാനം. യോഗത്തിന് എത്തുന്ന ആഭ്യന്തരമന്ത്രിയേയും ദക്ഷിണേന്ത്യന്‍ സംസ്ഥാനങ്ങളിലെ മുഖ്യമന്ത്രിമാരെയും നെഹ്റു ട്രോഫി വള്ളംകളി കാണാന്‍ ക്ഷണിച്ചിട്ടുണ്ടെന്നും സര്‍ക്കാര്‍ വ്യക്തമാക്കി.
സര്‍ക്കാര്‍ വിശദീകരണം ഇങ്ങനെ:
''തിരുവനന്തപുരത്ത് നടക്കുന്ന സതേണ്‍ സോണല്‍ കൗണ്‍സിലുമായി ബന്ധപ്പെട്ട് എത്തുന്ന വിശിഷ്ടാതിഥികള്‍ക്കായി സെപ്തംബര്‍ രണ്ടിന് പ്രത്യേക സാംസ്‌കാരിക പരിപാടി സംഘടിപ്പിക്കും. ഓണാഘോഷത്തിന്റെ ഭാഗമായാണ് പരിപാടി. ഓണാഘോഷങ്ങളുടെ ഭാഗമായി സെപ്തംബര്‍ രണ്ടു മുതല്‍ നഗരത്തിലെ വീഥികള്‍ വൈദ്യുത ദീപങ്ങള്‍കൊണ്ട് അലങ്കരിക്കും. സതേണ്‍ സോണല്‍ കൗണ്‍സില്‍ നടക്കുന്നതിനാല്‍ മണക്കാട് മുതല്‍ കോവളം വരെയുള്ള പ്രധാന വീഥിയുടെ ഇരുവശങ്ങളിലും വൈദ്യുതി ദീപാലങ്കാരങ്ങള്‍ ഒരുക്കുന്നുണ്ട്. കൗണ്‍സില്‍ യോഗത്തില്‍ പങ്കെടുക്കാനെത്തുന്ന കേന്ദ്ര ആഭ്യന്തര മന്ത്രിയേയും ദക്ഷിണേന്ത്യന്‍ സംസ്ഥാനങ്ങളിലെ മുഖ്യമന്ത്രിമാരെയും സെപ്തംബര്‍ നാലിന് ആലപ്പുഴയില്‍ നടക്കുന്ന നെഹ്റു ട്രോഫി വള്ളംകളി വീക്ഷിക്കാന്‍ കേരളം ക്ഷണിച്ചിട്ടുണ്ട്.''
കോവളം റാവിസ് കണ്‍വന്‍ഷന്‍ സെന്ററിലാണ് യോഗം നടക്കുന്നത്. കേന്ദ്ര ആഭ്യന്തരമന്ത്രി അമിത് ഷാ, മുഖ്യമന്ത്രി പിണറായി വിജയന്‍, ദക്ഷിണേന്ത്യന്‍ സംസ്ഥാനങ്ങളില്‍നിന്നുള്ള മുഖ്യമന്ത്രിമാര്‍, മന്ത്രിമാര്‍, ലക്ഷദ്വീപ്, ആന്‍ഡമാന്‍ നിക്കോബാര്‍ ദ്വീപ് തുടങ്ങിയിടങ്ങളില്‍നിന്നുള്ള ഭരണകര്‍ത്താക്കള്‍ തുടങ്ങിയവരും പങ്കെടുക്കും. സംസ്ഥാനങ്ങള്‍ തമ്മിലും കേന്ദ്ര സര്‍ക്കാരും സംസ്ഥാനങ്ങളും തമ്മിലുമുള്ള വിഷയങ്ങള്‍ ചര്‍ച്ച ചെയ്തു പരിഹരിക്കുന്നതിനുള്ള വേദിയാണ് കൗണ്‍സില്‍ യോഗം. രാവിലെ 10 മുതല്‍ രണ്ടുവരെയാണു സതേണ്‍ സോണല്‍ കൗണ്‍സില്‍ ചേരുന്നത്.
Post a Comment