ഫേസ്ബുക്ക് സുഹൃത്തിനെ വിവാഹം കഴിച്ച അഞ്ജുവിനെതിരെ പിതാവ്
ഡൽഹി :
പാകിസ്ഥാനിലെത്തി മതംമാറി ഫേസ്ബുക്ക് സുഹൃത്തിനെ വിവാഹം കഴിച്ച അഞ്ജുവിനെതിരെ പിതാവ്. ഞങ്ങള്‍ക്ക് മകള്‍ മരിച്ചെന്നും ഇനി ഒരു ബന്ധവുമില്ലെന്നും അദ്ദേഹം വ്യക്തമാക്കി. 'അഞ്ജുവിനെ കുറിച്ച് യാതൊരു വിവരവുമില്ല. കഴിഞ്ഞ ഒരു വര്‍ഷമായി അവളോട് സംസാരിച്ചിട്ടില്ല. ഞങ്ങളുമായി ഒരു ബന്ധവുമില്ലാത്തതിനാല്‍ അവള്‍ക്ക് എന്തും ചെയ്യാന്‍ കഴിയും. അല്ലെങ്കില്‍ തന്നെ ഭര്‍ത്താവിനെ മാത്രമല്ല മക്കളെയും ഉപേക്ഷിച്ച ഒരു സ്ത്രീയുമായി എങ്ങനെ ബന്ധം തുടരാനാകും' അദ്ദേഹം ചോദിച്ചു.
വിസ കാലാവധി കഴിഞ്ഞാല്‍ അഞ്ജുവിന് ഇന്ത്യയിലേക്ക് മടങ്ങാന്‍ കഴിയുമോ എന്ന ചോദ്യത്തിന് അവള്‍ മരിച്ചാലും കുഴപ്പമില്ലെന്ന മറുപടിയാണ് പിതാവ് നല്‍കിയത്. വീട്ടുകാരെ അറിയിക്കാതെ മകള്‍ പാക്കിസ്ഥാനിലേക്ക് പോയത് തെറ്റായി പോയെന്നും അദ്ദേഹം കൂട്ടിച്ചേര്‍ത്തു.
കഴിഞ്ഞ ദിവസമാണ് അഞ്ജു ഫേസ്ബുക്ക് സുഹൃത്തിനെ തേടി പാകിസ്ഥാനിലെ ഖൈബര്‍ പഖ്തൂണ്‍ഖ്വ പ്രവിശ്യയിലെത്തിയത്. തുടര്‍ന്ന് ഇസ്ലാം മതം സ്വീകരിച്ച് ഫാത്തിമയായ ശേഷം സുഹൃത്ത് നസ്റുല്ലയെ വിവാഹം കഴിക്കുകയായിരുന്നു. ഇരുവരുടെയും നിക്കാഹ് നടന്നതായി പാക്കിസ്ഥാനിലെ മലകണ്ട് ഡിവിഷന്‍ ഡെപ്യൂട്ടി ഇന്‍സ്പെക്ടര്‍ ജനറല്‍ നസീര്‍ മെഹമൂദ് സത്തി സ്ഥിരീകരിച്ചു. ഇസ്ലാം മതത്തിലേക്ക് മാറിയ അഞ്ജു ഫാത്തിമയെന്ന് പേര് സ്വീകരിച്ചു. നസ്റുല്ലയുടെ കുടുംബാംഗങ്ങളുടെയും പോലീസ് ഉദ്യോഗസ്ഥരുടെയും അഭിഭാഷകരുടെയും സാന്നിധ്യത്തില്‍ ദമ്പതികള്‍ ദിര്‍ ബാലയിലെ ജില്ലാ കോടതിയില്‍ ഹാജരായി. സുരക്ഷാ കാരണങ്ങളാല്‍, കോടതിയില്‍ നിന്ന് യുവതിയെ ഭര്‍തൃവീട്ടിലേക്ക് പോലീസ് അകമ്പടിയായി കൊണ്ടുപോയെന്നും അദ്ദേഹം വ്യക്തമാക്കി.
ഇന്ത്യയില്‍ വെച്ച് രാജസ്ഥാന്‍ സ്വദേശി അരവിന്ദിനെ വിവാഹം കഴിച്ച അഞ്ജുവിന് 15 വയസ്സുള്ള ഒരു മകളും ആറ് വയസ്സുള്ള ഒരു മകനുമുണ്ട്. 2007ല്‍ ആയിരുന്നു ഇവരുടെ വിവാഹം. ഭാര്യ ഉടന്‍ മടങ്ങിയെത്തുമെന്ന പ്രതീക്ഷയിലായിരുന്നു അരവിന്ദ്. വിസയെടുത്ത് പാക്കിസ്ഥാനിലേക്ക് പോയ അഞ്ജു സുഹൃത്തിനെ കണ്ട് കുറച്ച് ദിവസങ്ങള്‍ക്കുള്ളില്‍ തിരിച്ചെത്തുമെന്നായിരുന്നു പറഞ്ഞിരുന്നത്. ക്രിസ്തുമത വിശ്വാസിയായിരുന്നു അഞ്ജു.
അഞ്ജു നസ്റുല്ലയുടെ വീട്ടില്‍
ഇതിനിടെ അഞ്ജു നസ്റുല്ലയുടെ പുതിയ വീട്ടില്‍ സന്തോഷത്തോടെയാണ് താമസിക്കുന്നതെന്ന് ഖൈബര്‍ പഖ്തൂണ്‍ഖ്വ പ്രവിശ്യയിലെ ഒരു മുതിര്‍ന്ന പോലീസ് ഉദ്യോഗസ്ഥന്‍ അറിയിച്ചതായി പാക് വാര്‍ത്താ വെബ്സൈറ്റ് ജിയോ.ടിവി വ്യക്തമാക്കി. നാട്ടുകാര്‍ അഞ്ജുവിന് ഒട്ടേറെ സമ്മാനങ്ങള്‍ നല്‍കിയിട്ടുണ്ടെന്നും യുവതി സന്തോഷത്തിലാണെന്നും ഉദ്യോഗസ്ഥന്‍ പറഞ്ഞു.
ഇന്ത്യയില്‍ വച്ച് വിവാഹമോചിതായതായി അഞ്ജു പറഞ്ഞുവെന്ന് അപ്പര്‍ ദിര്‍ ജില്ലയിലെ ജില്ലാ പോലീസ് ഓഫീസര്‍ മുഷ്താഖ് ഖാന്‍ വെളിപ്പെടുത്തി.പ്രണയം തേടി ഇന്ത്യയില്‍ നിന്ന് പാക്കിസ്ഥാനിലെത്തിയ യുവതി ഇവിടെ സന്തോഷത്തോടെയാണ് ജീവിക്കുന്നതെന്നും അദ്ദേഹം കൂട്ടിച്ചേര്‍ത്തു.
'അഞ്ജുവിന്റെ പാകിസ്ഥാനിലേക്കുള്ള വരവ് സംബന്ധിച്ച അന്വേഷണം പൂര്‍ത്തിയായി. യുവതി ഒരു മാസത്തെ സന്ദര്‍ശന വിസയിലാണ് പാകിസ്ഥാനിലെത്തിയതെന്നും എല്ലാ രേഖകളും സാധുതയുള്ളതും കൃത്യവുമാണ്.', പൊലീസ് അറിയിച്ചു.
ആരാണ് അഞ്ജു?
ഉത്തര്‍പ്രദേശിലെ കാലോറില്‍ താമസിച്ചിരുന്ന അഞ്ജു ഒരു സ്വകാര്യ കമ്പനിയിലെ ജീവനക്കാരിയായിരുന്നു. 2007 ല്‍ അരവിന്ദിനെ വിവാഹം ചെയ്ത ശേഷം ഇരുവരും രാജസ്ഥാനിലെ ഭിവാഡിയിലാണ് താമസിച്ചിരുന്നത്. ഇവര്‍ക്ക് രണ്ട് കുട്ടികളുമുണ്ട്.
വര്‍ഷങ്ങള്‍ക്ക് മുമ്പ് നസ്റുല്ലയുമായി അഞ്ജു ഫെയ്സ്ബുക്ക് വഴി പരിചയത്തിലായി. സൗഹൃദത്തിലായതിനുശേഷം ഇരുവരും ഫോണില്‍ സംസാരിക്കാന്‍ തുടങ്ങി. ഇതോടെയാണ് ഇയാളെ കാണാനായി യുവതി പാക്കിസ്ഥാനിലെത്തിയത്.'തനിക്ക് നസ്റുല്ലയെ രണ്ട് മൂന്ന് വര്‍ഷമായി അറിയാമെന്നുംആദ്യ ദിവസം തന്നെ ചേച്ചിയോടും അമ്മയോടും ഇക്കാര്യം പറഞ്ഞിരുന്നുവെന്നും പാകിസ്ഥാനില്‍ പോയതിന് ശേഷം അഞ്ജു വെളിപ്പെടുത്തിയിരുന്നു.
Post a Comment